Corteza mikulit og kasaysayan
Mikulit og kasaysayan ang Pinoyng bilyarista nga si Lee Van Corteza isip labing unang Asyano nga nahimong kampiyon sa prestihiyusong Bottledeck.net 77th World 14.1 billiard tournament sa New York.
Nakuha ni Corteza ang kalampusan pinaagi sa pagbuntog sa gitawag og King of Straight Pool nga si Thorsten Hohmann sa Germany.
Dili lalim ang naagian ni Corteza sa usa ka semana nga kompetisyon diin 13 ka mga duwa ang iyang sunodsunod nga gisagubang diin dul-an sa 2,000 ka mga bola ang iyang napasulod.
Si Hohmann nakapasulod og 1,700 ka mga bola.
Ang World 14.1 title gikonsiderar nga maoy labing lisod nga angkunon sa usa ka bilyarista diin wala’y suwerte o short cuts ang makapadaog sa duwa.
Kini maoy ikatulong higayon nga nagparang ang taga Asya ug Europe sa finals ning maong torneyo.
Ang mga kababayan ni Corteza nga sila si Francisco Bustamante ug Efren Reyes nakasulod na sab sa finals ning maong kompestisyon apan parehong napakyas.
Ang finals usa ka race-to-300 point diin aduna’y 30 minutos nga pahuway kon aduna na’y makaabot og 150 points.
Midominar si Hohmann sa 1st half sa dinumbolay diin nakaposte siya og 146-78 nga labaw.
Apan nausab ang dagan sa estorya sa 2nd half diin adunay higayon nga nakasagunson si Corteza pagpasulod og 60 ka mga bola.
Sa hinayhinay, nakagukod si Corteza hangtod nga nakaposte siya og 217-183 nga labaw. Human niini, misagunson si Corteza pagpasulod og 83 ka mga bola aron dag-on ang kampiyunato.
Nagkanayon si Corteza nga bisan nalabwan na siya og dako, wala siya mawad-i og paglaom ug padayon siyang nagtutok sa duwa.