LeBron nasubhan og pilde sa pagbalik niya og duwa

Mibalik na og duwa si Lebron “King” James human wala kini nakapakita og aksyon sa nag-unang tulo ka mga duwa sa Cleveland Cavaliers sa pre-season sa National Basketball Association (NBA).

Si James, kinsa gikan nagpaalim sa angol sa iyang wa nga tiil, nimugna og 17 puntos apan nakahimo sab kini’g walo ka turnovers sa 94-108 nga kapildihan sa Cavaliers batok sa Chicago Bulls.

Kini maoy labing unang higayon nga niduwa si James kauban ang iyang suod nga higala nga si Dwyane Wade diin pareho silang sakop sa starting line-up sa Cavaliers. Si James ug Wade malampusong nag-uban sa Miami Heat diin nakabira sila og duha ka mga titulo sulod sa upat ka sunodsunod nga pagtaak sa finals.

Gawas nila ni James ug Wade, ang laing sakop sa bag-ong starting line-up sa Cavaliers mao sila si Derrick Rose, Kevin Love ug Jae Crowder. Si James na lang ang nahabilin sa orihinal nga starting lineup sa Cavaliers.

Si Rose nidugang og 13 puntos alang sa Cavaliers samtang nitampo og 12 puntos si Iman Shumpert.

“Tonight, I was off. I could feel it,” matod ni James. “It’s just my first action since the Finals and my timing was a little off and turnovers, I think, just trickled down to everybody. So, I made everyone’s timing off.”

Ang bag-ong starting five sa Cavaliers dili pa maayo og gipakita isip usa ka puwersa gumikan kay bag-o pa lang silang nag-uban.

Hinuon masaligon si James nga inig sa umaabot nga bagong season, hinayhinay na silang maka-adjust sa ilang tagsatagsa ka obligasyon. “I don’t think we’ll be the team we want to be in a week,” pasabot ni James.

“It’s going to be for the whole season. We’re going to have changes, we’re going to make changes, we’re going to become a better team as the games go on. So, the team opening night will not be the team that we know we can be.”