TITULO ILUGON SA JR. LANCERS
Duwa karon 5:00 pm- UV batok SHS-AdC Langkaton og suway sa University of the Visayas (UV) Baby Green Lancers ang korona sa ilang pagpakigsangka og balik sa defending champions Sacred Heart School-Ateneo de Cebu (SHS-AdC) Magis Eagles karong hapon sa Game 2 sa Cebu Schools Athletic Foundation Inc. (CESAFI) high school division finals series sa Cebu Coliseum.
Sa pagpangulo nila ni Biern Anthony Laurente ug Jim Paul Amistoso, ang Baby Green Lancers ningbuntog sa Magis Eagles, 69-59, sa Game 1 niadtong Martes aron pagposte og 1-0 nga bintaha sa best-ofthree series.
Usa na lang ka daog ug matambalan na sa Baby Green Lancers ang ilang kahidlaw sa titulo.
Ang Baby Green Lancers katapusang nakatilaw og titulo niadto pang 2011 panahon nila ni Paul Desiderio ug Ron Dennison, kinsa pulos nakahimo na’g dagkong pangalan sa UAAP sa Manila. Si Dennison sakop sa University of the East (UE) Red Warriors samtang si Desiderio sakop sa University of the Philippines (UP) Maroons.
Sa interbyu ning mantalaan kagahapon, si Baby Green Lancers Delfin Pepito kalmado ra sa iyang sinultian ug wala makita ang kahinam nga iyang gibati nga nag-ung-ong na sila sa ganghaan sa kampiyunato.
“Mao ra gihapon ang among preparasyon. Suwerte suwerte lang ni kay kahibalo man ta nga lig-on sab ang Sacred Heart,” matod ni Pepito kansang Baby Green Lancers nagpabiling wala’y pilde ning maong season sulod na sa 10 ka mga duwa gikan pa sa eliminasyon.
Matod ni Pepito nga nagtuo siyang adunay dakong adjustments nga himuon ang Magis Eagles ni coach Rommel Rasmo ug mao kini ang ilang gipangandaman.
“Nag-expect ta nga naay adjustments ang Sacred Heart. Pero ready mi bisan unsa pa nga duwa ang ilang ipagawas sa Game 2,” asoy ni Pepito.
“Basta ang akoa lang, modepensa lang gyud ang mga bata kay kanang opensa mosunod ra man na.”
Sa Game 1, ang Baby Lancers sayo nga mingratsada ug nakamugna dayon kini’g 20-9 nga labaw human sa 1st quarter.
Ninggukod ang Magis Eagles hangtod nga nailog nila ang labaw, 46-44.
Naghugpong sila si Laurente ug Amistoso aron pukawon ang opensa sa Baby Green Lancers ug tuod man, nakamugna sila og 62-54 nga labaw sa nahabiling 3:37 minutos.
Wala na molingi pagbalik ang Baby Green Lancers human niini.
Sa laing duwa niadtong Martes, gipangmakmak sa University of San Jose-Recoletos (USJ-R) Jaguars ang University of San Carlos (USC) Warriors, 85-69, aron angkunon ang ikatulong puwesto sa college division./ ESL