Di maoy solusyon

Gitangtang na sab ni Presidente Rodrigo Duterte ang tahas batok sa drugas gikan sa Philippine National Police (PNP) sa ikaduhang higayon. Hayan reaksyon kini ni Duterte sa pagtibugsok og maayo sa iyang survey rating ug sa laing survey nga nagtan-aw sa anti drug campaign nga mga kabos ra ang gipatay.

Ang pagkuha sa mao nga tahas gikan sa PNP di maoy sulbad sa suliran sa drugas. Mopahinay na hinuon kini sa kampanya tungod kay pila ra man ka buok ang mga sakop sa Philippine Drug Enforcement Agency (PDEA), kansang buhatan nagsalig ra usab sa abag sa PNP.

Di solusyon ang pagtangtang sa tahas ning suliran sa mga kahiwian sa mao nga institusyon nga dugay nang nakagamot.

Ang tinud-anay nga paglimpyo sa han-ay sa kapulisan, maoy angay ipadayon.

Ang iyang gitukod nga Presidential Anti-Graft Commission maayong tahasan usab sa pagsusi sa mga kahiwian sud sa PNP. Layo ang kahigayunan nga tabunan ang mga kasal-an sa mga pulis kon kining laing buhatan ang mosusi.

Mas maayong di kini itugyan sa kadagkuan sa kapulisan nga hayan mas kurakot pa kay sa niadtong naa sa ubos. Dako pa ang posibilidad nga sila mismo ang nalambigit busa ilang tabunan ang mga kasal-anan kay maratsada man sila.

Kining ikaduhang pagtangtang sa Presidente sa anti drug campaign usa ka band aid nga solusyon, di sulbad.

Mas maayo pang ipadayon niya ang anti drug campaign nga isangon sa kapulisan samtang gukdon ug tinud-on niya paglutos ang mga hiwi nga pulis, opisyal ug ulitimo.

Sa pagkakaron man gud, maorag gi-baby ang sad-an nga mga pulis. Iya pang pakpakan ang makapatay og durugista bisan kadudahan ang mga sikumstansya.

Tan-awa, kon tinud-on ug hugtan ang pagtaral aning kurakot nga mga pulis, motunhay ang anti drug campaign.