Cardinal Vidal naospital; di tinuod nga giatake
Nalandig sa Perpetual Succour Hospital si Cebu Archbishop Emeritus Ricardo Cardinal Vidal niadtong Miyerkules gumikan sa iyang mga balatian.
Si Dr. Rene Bullecer, usa sa mga suod nga higala ni Vidal, nagkanayon nga di tinuod ang mga report nga na-ospital ang 86 anyos nga prelate gumikan sa cardiac arrest o ataki sa kasingkasing.
Matod pa ni Bullecer gidala sa tambalanan ang Archbishop Emeritus gumikan sa dili maayo nga gipamati ni Vidal nianang pagkahapon dihang nawad-an na siya og panimuot.
Si Vidal nakasinati og pagpanglipong ug naglisod sa paginhawa hinungdan nga gidali siya sa pagdala sa tambalanan.
Gihulagway ni Bullecer nga daw niagi og semi comatose ang 86 anyos nga prelate.
Gumikan sa di maayong kondisyon sa panglawas ni Vidal, si Cebu Archbishop Joe Palma ug Cebu Auxillary Bishop Dennis Villarojo ningbisita sa tambalanan ug ningpahigayon sa Sacrament of Extreme Unction aron mahatagan og igong kusog ug maayong panglawas ang Cardinal.
Si Msgr. Joseph Tan, ang tigpamaba sa Cebu Archbiocesan, niklaro nga ang pagpahigayon sa sacrament of extreme unction wa nagpasabot nga naglisod ug nagkaduol na ang kinutoban sa kinabuhi sa 86 anyos nga kanhi Arsobispo sa Sugbo.
Gipasabot ni Tan nga ang sakramento mahimo usab nga ipahigayon aron ang mga masakiton maayo o kadtong naa ubos sa grabe nga gihambin nga balatian.
Si Vidal usa sa mga tinahod kaayong lider sa simbahang Katoliko sa tibuok nasod, nga bisan ang modagan pagka presidente ug ubang mga pulitiko makigkita kaniya.