Talisay City magtukod og task force alang sa trapiko

Usa ka task force nga maoy mosulbad sa kahuot sa trapiko sa Barangay Tabunok ug ubang bahin sa dakbayan sa Talisay tukoron ni Mayor Eduardo Gullas.

Matod ni Gullas nga ang kahuot sa trapiko sa Talisay dili masulbad sa usa o duha ka tawo ug deparpamento sa city hall.

Si Gullas niingon nga magkinahanglan siya'g tawo nga motutok sa maong suliran nga mantigo ug isog nga mopatuman sa mga lagda.

Iyang gibutyag nga dili kini madala sa mga traffic enforcer nga sakop sa City of Talisay-Traffic Operation Development Authority (CT-TODA) pinanguluhan ni Almond Dela Peña.

Matod ni Gullas nga ang usa sa suliran sa Tabunok nganong hout kaayo ang dagan sa trapiko mao ang sidewalk vendors nga anaa na sa karsada ug ang mga traysikol nga gihimo nang terminal ang karsada.

Hinungdan nga nakahukom si Gullas nga mohimo'g usa ka task force nga motutok sa paghawan sa mga karsada dili lang sa Tabunok apan lakip na sa ubang lugar sa Talisay.

Giangkon ni Gullas nga tungod sa suliran sa Tabunok nakaangkon siyag mga grabeng pagsaway ug reklamo, diha sa social media.

“I will craft a team as soon as possible. Unya ang head kanang ka antigo gyud nga mu assert ba,” matod ni Gullas.