You’re my destiny
Sagunson nang namisita sila si Jake ug Remon nako. Nahasol na ko. Naglibog na gyud ko. Kinahanglang modesisyon na ko aron mawala na ang mao kong mga gibati. Labi na kay akong nahibaw-an nga duna nay girlfriend si Rodell sa university nga iyang gitunghaan.
Gipamatyag ko ang akong kaugalingon, ang akong gibati. Wa ko batiag kasakit sa dughan. Ug tiungod ani, nakaingon ko nga husto si Glenda. Usa lang ka pag-admire ang akong gibati kang Rodell. Way love nga nahilambigit. Di si Rodell ang lalaki nga akong destiny. Nalipay ko nga midawat kog mga suitors kay nahibaw-an nako kon unsa gyud ang tinuod kong gibati kaniya.
Samtang nagsigeg pamisita sila si Remon ug Jake nako, si Jonjon panagsa na lang kaayo nga magpakita nako. Di ko kalikayan nga maghunahuna nga di na siya intresado sa iyang pagpangulitawo nako, nga tingali, misurender na siya sa iyang love nako.
“Kon nakahibawo ka na kon kinsa ang imong gimahal nilang tulo, Malou, so go for it. Desisyon na aron mohunong na ang uban sa paghasol nimo. Kon wa man kay love bisan kinsa nilang tuo, daygi sila. Sultihi sila sa tinuod.”
“Mao gyud nay akong buhaton, Glen.”
Mituyo gyud ko pag-adto sa ilang balay ni Glenda aron sumbongan ko siya sa akong problema.
“Duna ka na bay napili nila, Malou? Natugkad mo na ba sa imong pagbati kon kinsa nilang tulo ang imong love?”
Miduko ko. Duna koy gihinuktokan. Unya mitan-aw kog usab kang Glenda. Gipahiyoman ko siya. Wa koy tingog nga mitando. Nakita ko sa nawong ang kalipay nga gibati ni Glenda. Unya miyangu-yango siya.
“Di ko magpakisayod nimo kon kinsa nang lakiha, Malou. Ang ikasulti ko lang nimo, bisan kanila, nakauyon ko para nimo. Sa akong tan-aw ug paniid nila, mga buotan sila ug kasaligan.”
“Bitaw, Glen. Pero usa lang gyud kanila ang akong sugton.”
Usa ka gabii, namisita si Jonjon nako. As usual, seryuso siya.
“Pasensiya, Malou, kon panagsa ra ko mamisita nimo. Gusto kong tagaan kag igong panahon sa paghunahuna kon kinsa namong tulo ang imong love. Gipasagdan ko sila si Jake ug Remond nga maoy kanunay mamisita nimo. Sila man sab ang angay nimo, Malou.”
Guol kaayo ang nawong ni Jonjon. (TAPUSON SUNOD GULA)