Mga handumanan

LAMBERTO G. CEBALLOS

Cawayan, Dalaguete, Cebu Takna karon sa akong pag-inusara. Gihikyad ko sa lamesa ang mga butang Sa atong kagahapon, mga mutya Ning dughan sa tanang panahon. Kining puting panyo nga gihatag mo kanako Dihang mihilak ko kay gihagkan mo Sa unang higayon ang akong mga ngabil Nga matod mo nagduga sa katam-is Sama sa hinog nga tambis, May lama sa mga luha sa kalipay Nga wa mapala sa panahon Kay giangkon ko ang imong gugma. Kining singsing nga gisul-ot mo Sa akong tudlo maoy imong pasalig Nga ako lang ang babaye nga imong ihatod Sa altar sa kaminyuon, Akong gitipigan bisan milupad ka Sama sa tulin nga manatad Sa halayong dapit kuyog sa laing binuhat Nga wa mananghid sa naghulat Kong mga takna. Kining bugtong mong hulagway Nga nagpahiyom kanako nawad-an na Og kaambong sa imong pagbiya, Akong gitipigan kay relikyas Sa una kong gugma nga napakyas. Ug ang huni ug mga laray sa awit Nga nagbugkos sa timgas nga pagbati Sa atong mga kasingkasing Dili mahimong panason sa panahon Dinhi sa akong panumdoman Bisan ako nagpabilin nga ulay Sa katuigang hilom nga nanglabay.