UV: MOBALIK PAGDOMINAR
Human nila napusgay ang gingharian sa Sacred Heart School School-Ateneo de Cebu (SHS-AdC) Magis Eagles, ang University of the Visayas (UV) Baby Green Lancers malaumon nga maugbok na sab nila ang ilang dinastiya sa high school division sa Cebu Schools Athletic Foundation Inc. (Cesafi).
Ang Baby Green Lancers ningpukan pagbalik sa Magis Eagles sa Game 2, 7265, niadtong Huwebes aron tiklupon og sayo ang ilang best-of-three championship series ug angkunon ang labing una nilang titulo sulod sa unom ka mga tuig.
Sa wala pa ningdominar ang Magis Eagles, ang Baby Green Lancers mao ang kanunay nga naghari sa high school division sa labing dakong schoolbased basketball tournament sa Visayas ug Mindanao.
“Dako gyud nakong kalipay nga at last naputol namo ang domination sa Sacred Heart,” matod ni Baby Lancers coach Delfin Pepito.
“Karon sa akong tan-aw, ma-control ni namo og balik ang tournament.”
Basi sa nahinumdoman ni Pepito, mao kini ang ikapitong titulo nga iyang naangkon isip headcoach sa Baby Green Lancers.
Gibutyag ni Pepito nga sa kasamtangan niyang line-up, unom na lang ka mga magduduwa ang mahabilin sa sunod tuig apan wala siya nabalaka niini.
Ang unom nga mahabilin mao sila si Khenji Abad, Mar Leandro Actub, Gabriel Cometa, Beirn Anthony Laurente, Jearolan Omandac ug Joshua Yerro.
“Bisan kini silang unom, kombati na kaayo ni,” sagol komedya nga asoy ni Pepito.
“Bitaw wala ra mi nabalaka kay daghan man tang makuha nga players gikan sa atong passerelle team. Unya sige sab ang atong scouting.”
Gani matod ni Pepito nga pipila ka mga adlaw human sa ilang selebrasyon, magsugod na dayon sila og praktis ug ning higayuna, kauban na ang mga magduduwa nga potensyal nga mahisakop sa team alang sa sunod tuig.
Gipasabot ni Pepito nga ilang pangandaman mao ang umaabot nga City Olympics nga ipahigayon sa sunod buwan.
”Nagpasalamat gyud ko’g dako sa management sa ilang full support sa team. Amoa ning suklian sa pagdaog og championships,” dugang ni Pepito.
Ang Baby Green Lancers ninghuman sa Cesafi 2017 season nga wala’y pilde sulod sa 11 ka mga duwa gikan pa sa elimination round hangtod na sa pagbawi nila sa korona.