IHAWAN HAYAN SIRHAN

Buot pasirad-an pinaagi sa sa usa ka draft ordinance nga giaprobahan sa unang pagbasa sa konseho sa dakbayan sayo ning semanaha ang ihawan sa Mandaue nga mahimutang sa North Reclamation Area Special Admin Zone sa Barangay Labogon.

Matod pa, ang maong ihawan, wa na mikita ug padayong nag- subsidize ang kagamhanan sa operasyon niini.

Matod ni Konsehal Carmelino Del Mar, kinsa maoy nangamahan sa maong draft ordinance, nga usa ka pagtuon ang gihimo kalabot sa kondisyon sa maong ihawan.

“The result of the study was that the abbatoir is not generating income. The city is subsidizing its operations, thus prompted the city to consider its closure or resort to another remedy such as privatization,” matod ni Del Mar sa iyang draft ordinance.

Dugang niya nga aduna usay report nga gihimo ang Department of Environment and Natural Resources- Environmental Management Bureau (DENR-EMB) 7 nga nakuha sa Mandaue niadtong Septiyembre 1 nga nagkanayon nga nakalapas ang ihawan sa dakbayan tungod sa kapakyas niini sa paghimo og wastewater treatment facility sa operasyon niini ug pakyas sab sa pag- renew sa discharge permit di mominos usa ka buwan sa di pa ang expiration date sa permit. Sumala pa ni Del Mar nga tuyo sa pagpasirado mao ang pagdasig sa maayong panglawas ug kaluwasan sa mga residente.

Giklaro hinuon di Del Mar nga bisan ipasirado ang ihawan apan padayon gihapon ang pagbaligya sa karne sa dakbayan.

Iyang gitahasan ang City Veterinary Office sa dakbayan nga maoy mopatuman sa pagpasirado sa ihawan lakip na ang abandonment plan ug ang pagproseso sa tanang permit ug dokumento nga gikinahanglan alang sa pagpasira.

Hingpit na unyang mapasira ang ihawan kon aprobahan sa ikaduha ug ikatulong pagbasa sa konseho sa dakbayan ang sugyot ordinansahon.