SEKRETONG PAGTAHO IPAAGI SA ‘DROP BOX’

Pipila sa mga barangay sa dakbayan sa Mandaue ang nag-andam na sa ilang ' drop boxes' diin ihulog ang sekretong taho sa mga residente sa mga kaso sa kriminalidad, drugas, anomaliya ug korupsyon.

Kini maoy gipaambit ni Department of Interior and Local Government (DILG) Mandaue director Jhoaden Lucero sa dihang nahinabi sa mga tigbalita ning bag-o lang.

Matod ni Lucero nga gipahibalo nang daan sa iyang buhatan ang 27 ka mg barangay sa pagbutang og drop box.

“Ang objective gyud ana niya is for the community to help the government address issues on criminality, illegal drugs, even anomaly and corruption. The community can inform us anything about those areas so that amo na siyang ma- refer sa concerned agency,” ni Lucero sa mga tigbalita.

Pasabot niya nga kon adunay motaho kalabot sa kriminalidad ila kining itaho sa Philippine National Police o National Bureau of Investigation, kon drugas sa PDEA ug PNP ug kon mga anomaliya adto sa Ombudsman o Sanggunian.

Apan dunay pagduda nga di mahimong epektibo ang maong lakang pananglit dunay magtumotumo og taho.

“I-verify man na siya kay di man na siya kagawas nga automatic report. Ipagawas na siya after sa verification sa technical working group,” pasabot niya.

Sumala niini, adunay 4 ka paagi nga mahimong makahatag og impormasyon ang mga tawo.

Una mao ang paghulog og impormasyon sa mga barangay ug piniling simbahan nga partner sa DILG sa maong tinguha.

Ikaduha, pinaagi sa pagtawag sa hotline nga gihatag samtang ang ikatulo pinaagi sa email o Facebook.

Ang ikaupat mao ang pag- report sa ilang mga buot ireklamo sa technical working group diin didto sila makasulti ug taho diretso mismo sa hingtungdan nga ahensiya.

“Amo tawag ana niya kay information gathering, reporting ug monitoring,” ni Lucero. Dugang niya nga human sa tanang report kini ipaubos unya sa pag- monitor sa iyang buhatan inabagan sa ubang ahensya sa gobyerno.