Panggukod

Maorag sagpa sa administrasyong Osmeña ang pag- dismiss sa tanang mga kaso nga gipasaka ni Konsehal Margot Osmeña sa Ombudsman batok sa mga barangay kapitan nga kaalyado sa Team Rama. Gibasura sa Ombudsman ang mga kaso tungod sa kakuwang og basehanan sa sumbong.

Bisan unsaon gud og tan-aw, wa may nahimong krimen ang mga kapitan tungod kay gipang-uli na nila ang mga sakyanan. Sa pag-issue sa City Hall sa mga sakyanan, kada usa nila seguradong niagi sa proseso.

Samot na dihang gipang-uli sa mga barangay kapitan ang mga sakyanan.

Inay gigukod sa mga Osmeña ang mga kapitan, mas maayo pang ila kining gipasagdan nga mogamit sa mga sakyanan. Inay, ilang gipatawag ug gipakigtagboan ang tanang mga kapitan aron kuhaon ang ilang suporta, ilang giuna ang pagpanggukod.

Bisan tuod kon duna silay mga kaalyado sa matag barangay, ilang gipadaplin una ang pulitika tungod ug alang sa katawhang Sugboanon nga maoy nag-antos kay napagan.

Sa kadaghan na lagi sa suliran sa dakbayan sa Sugbo sama sa basura ug baha, ang pagpanggukod sa mga kapitan maoy giuna.

Kaanindot unta kon dunay lider nga di magtan-aw, kaalyado man o kontra, ang giuna mao ang kaayuhan sa tanan.

Tan-awa, kada uwan maorag suba ang mga karsada. Ang basura, midoble ang tuod gasto, pero nagkatag ang hugaw sa kadalanan.

Kon giseguro pa lang unta sa mayor ang kooperasyon sa mga kapitan ug konsehal sa siyudad, hayan daghan na kaayo og nahimo ang administrasyon karon.

Unsaon, human mapili sa miaging eleksyon, gipakita man gud dayon ang pagkamagukdanon. Kon mahimo pa tingali, hastang mga anino sa kaatbang apilon pa.

Kanus-a kaha motumaw ang usa ka lider nga panag-uli ang unang buhaton human sa piniliay?