Fatima

Binasi sa Isaias 25:6-10; Salmo 23; Taga Filipo 4:12-14, 19-20; ug Mateo 22:1-24

Dili nako matugkad ang akong gibati. Sulod sa usa ka plaza nga kaduhaon ang gidakon sa plaza sa Basilica ni San Pedro sa Roma, nagtindog ako ug ang akong pundok sulod sa lawod sa katawhan nga naggunit og gidagkotan nga kandila.

Kini ang sugod sa bihilya sa kasumaran sa katapusang pagpakita sa Birhen dinhi sa Fatima, Portugal, nga nahitabo niadtong Octobre 13, 1917. Tulo ka mga bata, si Lucia, Francisco, ug Jacinta, ang gipakitaan sa mahal nga Birhen. Nagsugod ang pagpakita sa Mayo 13 ug, sa sunod nga unom ka buwan, gawas sa Agosto, nagpakita ang Birhen matag 13 sa buwan.

Ang mga propesiya ang Birhen nangahitabo: ang pagkuyanap sa komunismo ug ang pag-antos sa Santo Papa. Kon lakturon nato ang mensahe sa Fatima mao kini ang tawag sa pagkakabig ug pag-ampo pinaagi sa rosaryo.

Ang managsuon nga si Jacinta ug Francisco giila na nga mga santo sa Simbahan. Ang ilang ig-agaw nga si Lucia namatay niadtong 2005 sa pangidaron nga 98. Di na pod tingali madugay nga ilhon siya nga santa.

Diha sa ebanghelyo gihisgotan ang usa ka kombira nga ang mga gipang-imbita wala manunga. Gipasulod na hinuon ang mga wala giimbita. Larawan kini sa gugma ug kaluoy sa Dios nga nag-awhag sa mga makasasala, nga naghulat lamang nga dawaton ug pasalamatan.

Apan gihisgotan usab ang usa ka tawo nga misanong apan wala magsul-ob sa insaktong bisti. Gipapahawa siya. Ang insaktong bisti kuno, sumala pa sa mga batid sa Bibliya, mao ang paghinulsol ug pagbuhat og mga maayong buhat. Sa ato pa, kining mga butanga gikinahanglan usab sa pagsulod sa gingharian sa Dios. Timailhan kini sa kasingkasing nga buot mosulod sa langit. Ang wala niini, ga-atik-atik lamang. Ug ang Ginoo dimamugos.

Gilarawan ni Propeta Isaias ang gingharian sa Dios isip usa ka bungtod nga buhong sa pagkaon, diin pagawagtangon na ang kamatayon. Mao kini ang pagadangatan sa mga andam mosulod sa langit.

Si San Pablo, kansang kasingkasing napunting sa langit, nagkanayon diha sa sulat ngadto sa mga Taga Filipo nga hanas siya nga mopuyo sa mapaubsanong kahimtang ug sa hamugaway. Kini nagagikan sa Ginoo nga maoy mohatag sa tanang gikinahanglan diha sa kabuhong ni Cristo.

Paminawon nato ang tingog ni Birhen Maria. Ang tanan natong mga gisagubang nga problema may gamot diha sa sala sa tawo, sa atong mga tig-a nga kasingkasing.

Ave Maria!