You’re my destiny
Gitan-aw kog dugay si Jonjon. Mitan-aw sab siyag dugay nako. Nakaduko ko. “Nganong nakaingon ka man nga sila si Jake ug Remon ang angay nako, Jon?”
Nagpabilin kong nagduko. Morag di ko makasugakod sa tinan-awan ni Jonjon nako. Dunay usa ka pagbati nga miturok sa akong kasingkasing para niya.
Ug nakasabot kaayo ko kon unsa kini.
“Layo ko sa imong sitwasyon, Malou. Sila duol sa imong pagkabutang kay parehas man mo nga mga anak og dato. Nakaila ka na nako. Wa koy gitago nimo. Open book ang akong kinabuhi diha nimo. Gisulti ko nimo kon unsa ako, kon unsa ming pamilyaha. Kon unsay mga trabaho nila ni Papa ug Mama, nga nagpuyo mi sa gamay nga ba’ay.”
Ning higayona, gusto kong gakson si Jonjon. Gusto kong ipabatyag niya nga nasayop siya sa iyang pagtuo. Gusto kong ipabatyag niya nga siya ang akong gihigugma. Apan nagpugong ko sa akong kaugalingon.
“Ingon ba diay ana kaubos ang imong pagtan-aw sa akong pagka babaye, Jon?”
Hapit di madungog ang akong tingog. Kahilakon ko. Gani, mikarat man ang akong tutunlan sa akong pagsulti.
“Di ingon ana ang akong pagtan-aw nimo. Ang reality klaro. Lupig kaayo ko nila ni Jake ug Remon.”
“Sa pagkabutang, oo, lupig ka. But bahin sa gugma lupig sila nimo.” “Ha?” Nakatan-aw pag-ayo si Jonjon nako. Ning higayona, gipahiyoman ko na siya. Nganong itago ko pa man niya ang tinuod kong gibat niya?
“Oo, Jon. Ikaw ang akong love.”
Daling mitupad paglingkod si Jonjon nako sa gilingkoran kong taas nga sopa sa among sala. Dali niyang gikuptan ang usa ko kamot. Gipasagdan ko siya sa iyang gibuhat. Klaro kaayo sa iyang nawong ang gibating kalipay.
“Salamat, Malou, nga gimahal ko nimo.”
“Ikaw ang gipitik sa akong kasingkasing, Jon. Way rason nga pakyason tika.”
Nakapiyong ko dihang gihagkan ni Jonjon ang akong lips, apan kadali ra ug light nga pagka hawok. Misandig ko sa dughan ni Jonjon. Iyang gisudlay ang akong buhok sa iyang mga tudlo. Nabatyagan ko kaayo ang dakong pagmahal ni Jonjon nako.
Sa misunod nga mga adlaw, nawala na ang gibati kong kahasol. Sila si Jake ug Remon very gentleman sab kay gidawat nila sa kinasingkasing ang pagpakyas ko sa ilang gugma nako.
(KATAPUSAN)