Kuripot kuno

Ang mga Cebuano naila na sa kuti nga pagpili og mga butang. Di dali-dali nga makombinser sa pagpalit kay tan-awon pa usab niini ang kalidad. Niadtong bag-o pa ko sa radyo, nitambong ko og press conference sa launching sa usa ka produkto.

Nangutana ko sa public relations specialist nga gikuha sa kompaniya kon nganong sagad sa mga produkto nga bag-o, ari ilusad sa Cebu. Bisan sa pagpa-test sa produkto, akong nabantayan nga dinhi gihapon.

Ingon sa specialist nga nabantayan sa dagkong companies nga kon ang usa ka produkto makapasar sa mga Cebuano, seguradong mo-click usab ni sa ubang mga dapit sa Pilipinas. Kay ang mga Cebuano kuno, sagad kuripot apan mangita og kalidad. Na-shock ming tanan sa tubag sa specialist.

Sa biseklita, naay mangutana nako kon unsay maayong biseklita, tagpila, de kalidad ba ug unsa nga brand. Mahimuot ko kay di man ko eksperto kon unsay maayo bisan tuod naagian na nako ang duha ka sikat nga bike parts brands, Shimano ug Sram.

Sa tinuod lang, ang kalig-on ug kalidad sa usa ka butang nag-agad usab sa iyang presyo. Mas mahal, mas maayo og kalidad tungod kay maayo usab ang materyal ang gigamit paghimo.

Sa akong mga kadena, di na moubos og P450 ang akong gipamalit kay sa akong mga higala nga nagmantinil lang og tag P170 nga chain, kapila na maputli sa karsada. Busa, sa sunod, ayaw na pangutana og presyo kay kon ka gusto og maayong kalidad, you have to pay for the price of your build.

Kon gusto kang makadaginot, sagula ang brand new ug slightly used nga second hand.

UNSAY SEGURUON

Kon nag mountain biking ka, wa kinahanglana nga mahalon kaayo nga frame ang imong gamiton. Mao ni ang akong naamguhan. Mas labing maayong kon ari ka sa mga dapat mo-invest kon gusto ka og durable nga biseklita. Mag-unsa man nang mahalon nimong body unya nagmantinil ka lang sa imong drive train?

Alang nako, mas maayong mo-invest ari sa mga dapat kay sa frame kay ang kanang imong karaan nga frame, moaguwanta pa na bisan sa pipila ka tuig nga gamit nimo. Ang drive train nagkinahanglan og ilis from time to time kay mao ni ang pirme galihok.

UNSAY MAAYO

Ang labing maayo nimong buhaton mao ang pagpa-tune up sa imong biseklita labing minos ka usa sa usa ka buwan, labina kon bag-o pa kay magsige pa og kainat ang mga kable ini. Mas maayo nga ikaw mismo kahibawo mo tune up.

Apan kon pareho ka nako, pag budget alang sa tune up sa biseklita. Basta sa biseklita, ang importante nalingaw ka ug wa kay pangos o piang sa imong pag-uli. Kay kon naa kay asawa, seguradong yawyawan ka.