GIN 2-0 ANG TUYO

Duwa karon 6:30 pm - Ginebra batok Meralco

Mosuway pagposte og 2-0 nga bintaha ang defending champions Brgy. Ginebra Gin Kings sa ilang pagpakigbatok og balik sa Meralco Bolts sa Game 2 karong gabii sa Philippine Basketball Association (PBA) Governor’s Cup conference best-of-seven championship series sa Araneta Coliseum.

Ang Gin Kings ningpagawas sa katakos nga nagpahimo kanilang kampiyon sa ilang pagmakmak sa Bolts sa Game 1, 102-87, niadtong Biyernes sa Lucena City aron pagposte og 1-0 nga bintaha sa series.

Apan giklaro ni Ginebra coach Tim Cone nga wala pa sila’y nakab-ot ning puntoha, kinahanglan pa nilang mokayod og maayo ug dili molugak bisan gamay.

“Last time we played Meralco last year, they won Game 1 and we ended up winning the championship. That’s a cautionary

tale for us,” matod ni Cone sa interbyu sa Spin.ph.

Nidugang si Cone nga wala na sab napagawas sa Bolts sa Game 1 ang katakos nga nagpahimo kanila nga No.1 team human sa elimination round.

Nabantayan ni Cone nga nagsalimoang ang Bolts sa ilang itsa sa gawas hilabi na sa three-point area diin ang Bolts maoy numero sa liga. Sa Game 1, ang Bolts igo lang mitali og 24 percent threepoint shooting.

“They looked a little rusty. They didn’t look real sharp. They’re coming off a four-game winning streak and a sweep of a series (against Star). We just got them on a night where they may not be totally prepared,” dugang ni Cone.

Alang kang Meralco coach Norman Black, gisupak niya ang pamahayag ni Cone nga natay-an og gamay ang ilang kapabilidad gumikan sa sayo nilang pagpahuway human nila gisiruhan ang Star Hotshots sa semi-finals series, 3-0. “No, I don’t agree with him,” matod ni Black kabahin sa pamahayag ni Cone.

Hinuon malaumon si Black nga makabawi sila ning higayuna.