ADLAW NA’S PAGHUKOM

Duwa karon 4:00 pm- UC batok UV

Wala na’y laing ugma ug kinahanglang ihabwa ang tanang angayang ihabwa nga katakos sa panagharong og balik sa defending champions University of the Visayas (UV) Green Lancers ug University of Cebu (UC) Webmasters sa deciding Game 3 karong hapon sa Cebu Schools Athletic Foundation Inc. (CESAFI) basketball finals college division sa Cebu Coliseum.

Human sila nakabawos sa Game 2, 77-66, niadtong Biyernes nga maoy nagtabla sa series, 1-1, ang Green Lancers tatawng nakaangkon og balik sa momentum ning maong panagparang.

“Taas kaayo ang moral sa akong players karon. Even sa Game 2 bisan gikan mi sa pilde, taas man gihapon ang ilang moral,” matod ni Green Lancers coach Gary Cortes.

Si Webmasters coach Raul “Yayoy” Alcoseba wala motubag sa tawag ning mantalaan.

Sa Game 2, ang Green Lancers ningsandig og maayo sa abilidad nila ni Jerome Napao ug Tristan Albina, kinsa parehong nagpakatap og 18 puntos aron pangulohan ang kadaugan.

Si Rey Suerte nidugang og 13 puntos alang sa Green Lancers samtang nidugang og 12 puntos si Monic Soliva.

Sama sa naandan, ang Webmasters gipangulohan na sab sa ilang impresibong import nga si Frederick Elombi pinaagi sa iyang 19 puntos.

Asoy ni Cortes nga malaumon siyang madepensaan nila ang titulo apan iyang giklaro nga nagdepende ra gyud ang tanan sa paningkamot sa iyang mga magduduwa.

“Tan-aw nako, hayaghayag na ang among chance nga makadepensa mi sa title basta mo- go hard lang gyud ang akong players and I’m sure they will,” dugang ni Cortes, kinsa nagtinguha sa iyang ikaduhang titulo isip head- coach sa Green Lancers. “Nag- expect ko nga binirahay na gyud ni kay dili sab bastabasta magpalupig ang UC. At least karon, kahibalo nami sa ilang strength.”

Gawas kang Elombi, ang Webmasters nagkinahanglan og suporta sa ilang lokal nga mga magduduwa hilabi na gikan nila ni John Calvin Jabello, Justine Dacalos, Joven Tagudin ug ang nagkakuyaw nga si Ruben Ludovice.

Sa laing bahin, si Jaybie Mantilla sa University of San Jose Recoletos (USJ-R) Jaguars maoy napiling MVP.

Kauban ni Mantilla sa Mythical Five mao sila si Suerte ug Napao sa Green Lancers, Garciano Puerto sa Webmasters ug John Reel Saycon sa University of San Carlos (USC) Warriors.

Ang awarding gipahigayon sa wala pa nagsugod ang Game 2.

/ ALLAN DEFENSOR ■ FINALS: Hugot nga depensa ang gipahamtang ni Rey Suerte sa UV Green Lancers (wa) ngadto sa nilusot nga si Garciano Puerto sa UC Webmasters (tuo) ning aktuha sa Game 2 sa CESAFI Finals men’s basketball niadtong Biyernes.