Taken for granted
Bisag nakaingon ko nga wa koy love kang Nick apan nagpadayon ko sa pagpakigrelasyon niya. Unya ko na siya buwagi kon masuta ko nga gihigugma na gyud ko ni Rowell ug biyaan na niya ang iyang mga girlfriend. Wa sab nako sudyai si Rowell sa akong nakita nga sweet siya ug ang babaye nga mabdos.
Nganong sudyaan ko man siya nga sa wa ko pa siya sugta nakahibawo na man ko nga daghan siyag trato?
“Kining, Sandra, di sa ko mamisita nimo, ha? Duna koy importanteng atimanon.”
Nanan-aw mig sine si Rowell niadtong tungora. Wa ko siya pangutan-a kon unsay iyang atimanon. Unsaon, mao ray akong gipamatyag ang kalihokan sa iyang kamot. Mosaka kanaog kini sa akong lawas. Usahay makapiyong ko ug mapaak ko ang akong lips.
“Husto na, Rowell.” Mihagawhaw ko.
Apan wa maminaw si Rowell nako. Sus, morag di na ko makaantos sa gibati kong kagilok.
Nakakabyon ko sa liog ni Rowell. Naghinagkanay mi sa lips. Dugay gyud.
“Adto ta sa lugar nga kita rang duha, Sandra.”
Parehas mi si Rowell nga naghangos. Ning higayona, wa na ko makabalibad. Kadaghan na mohangyo si Rowell nako nga mo- check-in mig motel apan kanunay ko siyang gibalibaran. Apan ning higayona, nadala na gyud ko sa akong gibati. Sa usa ka motel sa reclamation area mi nangadto si Rowell. Nakahilak ko pagkahuman sa among gibuhat. Gialam-alaman ko ni Rowell. Gihagkan-hagkan ko niya.
“Ayaw kaguol, Sandra. Di tika pasagdan.”
“Basta, ha?” Nagpamahid ko sa akong mga luha. “O lagi.” Mituo ko sa gipasalig ni Rowell nako. Apan labaw kong gisakitan kay naglikay na siya nako sa misunod nga mga adlaw.
“Na, nagpada’a gyud ka sa imong love niya, Sandra. Ikaw gyud ang alkanse ning tanan. Ang imo ra gyung lawas ang iyang gusto. Wa siyay gugma nimo. Siyaro, wa gyud ka kasabot nga taken for granted man lang ka niya?”
Morag di mohunong ang pagpangagas sa akong mga luha. Naghlak kong misumbong kang Abigail sa nahitabo namo ni Rowell ug sa paglikay na ani nako.
“Dako gyud kong gaga, Abigail.”
“Gaga molang. Makagaga gyud ning gugma nga wa sa lugar.”
Nakapanglingo si Abigail. Nakapanghupaw siya. Nakahibawo ko nga naluoy siya nako.