Haya ni Vidal ibalhin sa Archdiocesan Shrine
Ibalhin alas 7 karong buntag ang haya ni Archbishop Emeritus Ricardo Cardinal Vidal, 86, gikan sa Cebu Metropolitan Cathedral ngadto sa Archdiocesan Shrine sa San Pedro Calungsod, Archbishop Palace sa dalan Jakosalem, dakbayan sa Sugbo.
Kini tangkod sa ikalima ka tuig nga pagkahimong santo ni San Pedro Calungsod diin si Vidal maoy nangusog kaniadto nga mapadali ang canonization sa Sugbuanong Calungsod sa Rome.
Kapin sa 1, 000 ka mga batan-on nga sakop sa Archdiocesan Commission on Youth (COY) ug ubang grupo sa mga batan-on gikan sa lainlaing parokya ang mohatag og tribute pinaagi sa misa karong alas 3 sa hapon alang sa cardinal nga pagadumalahon ni Fr. Andrei Vintanilla, secretary ni Cebu Archbishop Jose Palma ug assistant chairman sa COY.
“The Cardinal always had a special place for the youth in his heart,” matod ni Frankel Margalo, youth coordinator sa COY.
Gipadayag ni Margallo nga gawas sa misa, ang mga batan-on motanyag og necrological service, pagkanta isip ilang halad sa nitaliwan nga cardinal, kinsa nihulagway nga kini maoy ilang katapusang paghatag og pasalamat sa kanhi archbishop gumikan sa iyang natampo sa mga batan-on.
Sa 1985, si Vidal ang nagpasiugda sa unang Local World Youth Day dinhi sa Sugbo human sa duha ka tuig niyang pagdumala sa Cebu Archdiocese.
Siya usab ang instrumento sa pagkaumol sa Archdiocesan Youthlinks Training and Assessment Center Inc. nga maoy naghatag og kahigayonan sa mga out-of-school youth nga mabag-o.
Ang haya ni Vidal molungtad hangtod alas 7 karong gabii diin matag oras gikan sa buntag adunay misa nga pagahimuon ug ibali na usab kini ngadto sa Cathedral sa dili pa ang alas 8 sa gabii para sa requiem mass. Way makahulip kang Vidal Gihulagway ni Archbishop Socrates Villegas sa Lingayen Dagupan nga di ordinaryo nga pari si Cardinal Vidal, kinsa iyang gihulagway nga way si bisan kinsa nga makahulip ug makasama sa nitaliwan nga kanhi Archbishop sa Sugbo.
“Cardinal Vidal is not an ordinary father, he is super extraordinary. As I said in the homily, we will never be the same without him because he is unique in the whole world. I don’t think anyone can ever replace him.” padayag ni Villegas.