Pinulbos nga Kamunggay

Dugay nga nag-antos sa iyang sakit ang akong silingan kaniadto nga si Lumen tungod sa kagid-kagid ug nuka-nuka nga miputos sa iyang lawas. Tungod ini, wala siya’y guwa-guwa sa iyang pinuy-anan kay naglikay sa uwaw, yaga-yaga ug sakit nga mga tamay.

Gisuwayan niya pag-inum og tunga sa tasang pinuga nga kamunggay kada adlaw para mahinlo ang sulod ug gawas sa iyang lawas. Ang duga sab ini iyang gibagnos sa preskong mga samad aron daling mo uga ug maayo. Tuod man, naayo ug naulian si Lumen.

Tungod kay abunda man ko sa kamungay, akong gitabangan si Lumen og tanom mismo sa iyang tugkaran aron daghan siya’g magamit ug dili makapsan.

Kining kamunggay o malunggay nga nailhan sa tibuok kalibutan nga moringa oleiferia, nabantog nga usa ka sagradong kahoy tungod sa ka daghang sustansiya ug tambal nga nahatag ini sukad pa kaniadto.

Gitawag sab kini og All-inOne nga kahoy tungod kay ang tanang parte ni-ini makaon man gikan sa dahon, ugat, punuan, sanga, pungango ug bunga.

Gani, ang usa ka gramo lang ini parehas na og gidaghanon sa Bitamina C nga makuha sa pito ka Orange. Upat ka beses sab kini nga mas daghang Bitamina A kay sa Carrots. Kaupat sab kini pil-on sa gidaghanon sa calcium nga makuha sa gatas sa baka. Katulo sab pil-on ang potassium nga makuha sa saging, og duha ka beses ang gidaghanon sa protina nga makuha sa Yogurt.

Ang dahon ini kung pa ughon sa hangin dayon sangagon ug pulbuson mahimong tigumon para ikasagol sa ubang pagkaon (kan-on, sudan o sabaw).

Ang 50 ka gramo lang gani ini nga ikasagol sa pagkaon maka menus na og 21% sa kamay nga anaa sa atong dugo kon blood sugar. Duna sab kini ‘Isothiocyanates’ nga makatabang pagbantog sa mga makamatay nga kagaw og sakit nga cancer.

Busa sa sunod nimong kaon, ayaw sipyata pagsagol sa imong tsa, juice, kan-on o sud-an kining pinulbos nga kamunggay.

Dili lisod buhion ang kamunggay kay motubo ra kini bisag asa deretso sa yuta o kina-ang. Makahatag sab kini og landong sa palibot ug preskong hangin.