Reklamo batok Deputy mayors

Laing reklamo karon ang gipasaka ngadto sa buhatan sa ombudsman batok ni Cebu City Mayor Tomas Osmeña kalabot niining iyang pagpanudlo og mga deputy mayors sa pipila ka mga sakop sa konseho nga iyang kaalyado. Ang kanhi regional director sa National Bureau of Investigation (NBI) Florencio Villarin, kinsa usa usab ka abogado, ang mipadangat sa reklamo nga iyang gibase sa nalatid nga provision.

Gitumbok ni Villarin nga samtang dunay balaod nga naghatag og gahum sa mayor nga makatudlo og iyang deputy mayor, apan ang Article 1, Section 455 sa Local Government Code nag-ingon nga gidili sa mayor ang pagtudlo og sakop sa konseho alang sa maong puwesto.

Gipasabot ni Villarin nga ang trabaho sa mga konsehal kutob lang sa legislative functions ug aron paglikay sa duplikasyon dili kini makaasumir og position nga ubos sa executive branch.

Lig-on og punto kining reklamo ni Villarin kay duna man siyay balaod nga gibasihan. Tiaw mo bay konsehal na, unya mayor-mayor pa.

Gilakip ni Villarin sa reklamo ang mga konsehal nga sila si sila si Eugenio Gabuya Jr., Joy Augustos Young, Atty. Sisinio Andales, Mary Ann delos Santos, Dave Tumulak, Margot Osmeña, Alvin Arcilla, Hanz Abella ug Jerry Guardo. Dawat man gani si Andales nga nasuheto sa balaod.

Apan ang wa nato masabti kon nganong giapil ni Villarin si Vice Mayor Edgardo Labella.

Tungod kuno kay wa mobadlong isip presiding of�icer sa mga konsehal, ilabi na sa iyang tulo ka kanhi kaalyado nga sila si Guardo, Labella ug Tumulak.

Unsa may labot ni Labella nga si Osmeña may nitanyag unya di man siya kabuot kon unsay buhaton sa mga konsehal?