‘DRUG LORD’ MIPAUSAB SA NAWONG, SIKOP
MGA MATA ‘GIPABUDLAT’; 3 KA PULIS NASAMAD SA PAGLUGNOT
Drug lord nga nalinya ni Franz Sabalones sa iyang illegal nga negosyo ang nadakpan sa mga sakop sa Criminal Investigation and Detection Group 7 Miyerkules sa hapon gawas sa dakong mall nga nahimutang sa South Road Properties.
Naglisod sa pag-ila kaniya sa nanglabay nga mga buwan ang mga pulis kay nagparetoke kini sa iyang nawong.
Armado sa search warrant ang CIDG-7 nga giluwatan ni Judge Hermes Montero sa Regional Trial Court Branch (RTC) Branch 59 sa syudad sa Toledo sa kalapasan sa section 5, Article 2 sa Republic Act (RA) 9165 kun Comprehensive Dangerous Drugs Act of 2002.
Ang nasikop giila nga si Dennis Lorella Lapa, alyas Tete, 40, taga barangay Ibo, syudad sa Toledo apan magbalhin-balhin na og puyo human gironda sa iyang panimay sa miaging tuig.
Ang CIDG-7 nakadawat og kasayuran gikan sa ilang asset nga manghuwam og si Lapa ug didto sila magtagbo sa mall sa may SRP sa Barangay Mambaling, syudad sa Sugbo nga maoy hinungdan nga ilang gipanid-an.
Matod ni Chief Insp. Chuck Barandog nga maoy nangulo sa operasyon nga idlas nga klase nga pagka drug personality si Lapa. Nalakip siya sa High Value Target sa kapulisan sa Probinsya diin ang iyang area of distribution mao ang mga bukirang barangay sa dakbayan sa Toledo.
“Sa double barrel pa lang, naapil nana sa HVT list unya jumping from one place to another
to avoid arrest, namonitor nato, nagtago siya sa Catmon, Carmen, Danao nya lately lang namonitor nato naa siya sa Talamban,” matod ni Barandog.
Milanat ug duha ka oras ang ilang pagpaabot sa gawas sa dakong mall sa SRP hangtod nga ila nang nasigpatan nga padung na nga mosakay og
taxi nga maoy hinungdan nga ila dayon ning gidakop.
Tungod sa kataas niini ug ka solid sa lawas, naglisod sila sa pagposas sanglit milugnot kini nga miresulta sa pagkapangos nilang Barandog ug laing duha ka police nga sakop sa CIDG-7.
Human siya gi- target sa mga awtoridad, nagpa usab na sa iyang panagway si Lapa diin ang iyang Intsikon nga mata, iya nang gipabudlat aron di na siya mailhan sa mga pulis nga nangita kaniya.
“Intsikon ni siya sa una sir pero karon na shock mi kay dako na siya og mata. Nagpausab na ni siya og nawong,” dugang ni Barandog.
Atol sa pagrekisa kaniya, nakuha sa iyang posisyon ang usa ka kalibre .38 nga revolver nga dunay tulo ka mga bala, duha ka medium packs ug unom ka gagmayng pakete sa gituohang shabu.
Giangkon ni Lapa nga sa dihang wala pa mapili si Presidente Rodrigo Duterte, nalambigit siya sa ilegal nga drugas apan niundang na siya sa dihang milingkod na kini sa katungdanan.
Gihimakak usab niya ang pasangil sa kapulisan nga sakop siya sa gaway ni Sabalones.
“Sa una, sa wala pa modaog i Duterte, namaligya ko, wala ko kaila anang franz sabalones kay naa rako sa Toledo,” matod ni Lapa.