24 ka barko wa makalarga

Di mominos 24 ka mga sakyanan sa kadagatan ang wa tugti nga makabiyahe paingon sa tagsatagsa ka destinasyon sa Kabisay-an gumikan sa dautang panahon.

Ang Philippine Atmospheric Geophysical and Astronomical Services Administration (Pagasa) Visayas niisyu og gale warning tungod sa kadagko sa mga bawod nga epekto sa bagyong Paolo.

Kagahapon, luwas nga nakadunggo ang LCT Lite Ferry 26 sa Ouano Wharf, dakbayan sa Mandaue human kini makasugat og problema samtang naglawig paingon sa Tubigon, Bohol kagahapon.

Luwan niini ang 14 ka mga pasahero, 9 ka rolling cargoes ug 23 ka mga tripolante.

Si Coast Guard Station Cebu Commander Jerome Cayabyab nibutyag nga gumikan sa gale warning ang gagmay nga mga barko ug ubang sakyanan sa kadagatan nga ubos sa 250 gross tonnage ang gidid-an nga makalawig aron maseguro ang kaluwasan sa mga pasahero.

Matod niya, mismo ang ubang mga kompaniya sa barko ang nihukom nga di mopadayon sa mga biyahe sanglit di makasugakod sa kadagko ug kakusog sa bawod.

Apil sa mga biyahe nga apektado ang paingon sa Tagbilaran, Ormoc, Danao, Camotes ug Sibulan sa Negros Oriental, base sa mga report nga nadawat sa ilang substations sa Aduana Pier 3, Mandaue, Camotes, Santander ug Hagnaya.

Si Jhomer Eclarino, weather specialist sa Pagasa Visayas, namahayag nga gipakusog sa bagyong Paolo ang hanging habagat nga maoy hinungdan sa kadagko ug kakusog sa bawod sa kadagatan sa Kabisay-an.

Ala 1:45 sa hapon kagahapon, niisyu og gale warning ang Pagasa Visayas tungod sa mabaluron nga kadagatan sa Sugbo, Samar Provinces, Antique, Leyte Provinces, Siquijor, Biliran, Bohol, Negros Provinces, Guimaras, Aklan apil ang Boracay Island, Capiz ug Iloilo.

Si Cayabyab nimando na og imbestigasyon sa nahitabo sa Lite Ferry 26 nga nigikan sa pantalan sa Mandaue alas 10 kagahapon sa buntag.

Apan pagka alas 12:21 sa udto giradyohan sila sa usa sa mga

crew sa barko nga nagpahibawo nga mobalik sila sa agi tungod sa kadagko sa bawod sa dagat.

Tungod sa kakusog sa bawod giingong nisulod na ang tubig sa ubos nga bahin sa barko ug naputol ang kable nga naghigot sa rampa nga agianan sa mga kargamento diin nahitabo kini dapit sa Lawis Ledge, habig sa siyudad sa Talisay, base sa post sa Facebook page sa dyLA.

Tungod sa bagyong Paolo, masinati sa Sugbo ang madagumon nga kalangitan uban sa katag nga pag-ulan. Baluron usab ang kadagatan. /