Tomas mohatag og reward sa makatudlo kang Erasmo

Mohatag og P10,000 si Mayor Tomas Osmeña isip reward sa makatudlo sa nahimutangan ni Edward Erasmo nga moresulta sa iyang pagkasikop.

Siya maoy nagpukpok og bato sa bintana sa taxi nga napusgay gumikan sa away sa trapiko niadtong Oktubre 17 sa may Pope John Paul II avenue sa dakbayan sa Sugbo.

Usa ka Cai Cabanalan ang nag-post sa Facebook pinaagi sa pagpatidpatid ni Erasmo sa taxi nga gimaneho ni Christopher Lador ug wa matagbaw nipunit og brick dayon hapak sa bildo.

Ang mga pasahero ni Lador daling ninaog sa taxi ug nipalayo gumikan sa ilang kahadlok apan gikuhaan kini og video ug gi- post nga niabot na ang view og 4 milyones ug 3,100 shares.

“If you behave like that, I’ll even spend more than P10,000. That’s a warning to everybody. Don’t do that in our city,” Bahad ni Osmeña.

Ang mayor nagkanayon nga daghan na siya og impormasyon nga nadawat ug iya na kining gi- forward sa Cebu City Police Office.

Gipahibawo ni Osmeña nga usa sa kasayuran nga iyang nadawat, si Erasmo nilarga dayon paingon sa Manila.

Gitug-an niya nga di ‘rich kid’ si Erasmo ug ang kabanay niini nagtrabaho sa call center.

DAGHANG KASO

Si Supt. Ryan Devaras sa Investigation and Detective Management Branch nibutyag nga ilang pasakaan og kasong physical injury, grave threats ug malicious mischief si Erasmo sa Prosecutor’s Office.