Pagbalhin sa bag-ong merkado malangay

Giangkon ni Mayor Luigi Quisumbing sa dakbayan sa Mandaue nga malangay sa pagbalhin sa bag-ong merkado ang mga tindera sanglit di pa man mahuman ning tuiga ang pagtukod sa maong edipsyo.

Sumala sa mayor nga anaa sa 65 porsiyento ang nahuman sa kontraktor sa pagtukod sa bag-ong merkado sa daang pwesto niini luyo sa simbahan sa St.Joseph.

“Nagkaproblema man gud because the soil conditions in the area where the market is located is a lot less compact,” ni Quisumbing.

Dugang niya nga tungod niini, mas dugay nga preparasyon ang gihimo sa kontraktor alang sa pundasyon sa maong merkado.

Masaligon hinuon si Quisumbing nga ang nahabiling 35 porsyento sa pagtrabaho sa merkado madali paghuman sa kontraktor.

Naguba ang kasamtangang merkado luyo sa sports complex human miigo ang 7.2

magnitude nga linog niadtong Oktubre 15, 2013 sa Sugbo ug Bohol.

Usa ka tindera ang namatay niadto human natagakan sa kisame sa merkado. Human sa linog ang maong merkado gideklarar nga di na luwas nga tindahan sa sulod niini.

Kapin sa duha ka tuig human sa linog, usa pa nasugdan ang pagtrabaho sa bag-ong merkado niadtong Enero 2016.

Si City engineer Andres Suson niingon niadto nga ang bag-ong merkado makasugakod na og hangtod intensity 10 nga linog aron di na unya mausab ang nahitabo niadtong 2013 nga daling naguba ang edipisyo.