Dakong bahin sa budget alang sa baha, trapik

Gitataw ni Mandaue City Mayor Luigi Quisumbing nga dako og ikatabang sa pagsulbad sa problema sa baha ug kahuot sa trapiko sa dakbayan ang dakong bahin nga gitagana niini gikan sa P4.2 bilyones nga budget alang sa 2018.

Apan ang mayor nagkanayon nga di basta-basta masulbad ang duha ka dagkong mga problema kon way kooperasyon sa publiko.

Alang sa problema sa basura, gitagan-an sa proposed 2018 budget og P105.64 milyones ang flood control projects sa dakbayan.

“Di lang pulos infrastructure ang tubag sa atong problema, kinahanglang sad nato ang engagement sa katawhan nga dili na bitaw pataka og labay sa basura bisag asa kay bisag magtukod pa ta og 120 inches nga culvert, ang ending in a few months, ma-block ra gihapon na tungod sa basura,” pasabot ni Quisumbing sa dihang nahinabi sa mga tigbalita. Gawas sa flood control project, nigahin usab ang dakbayan og P170 milyones alang sa pagtukod sa Material Recovery Facility (MRF) sa kanhi Umapad dumpsite.

Sigun ni City Planning and Development Office Marlou Ocleasa nga sulod sa maong MRF ang tulo ka dagkong mga conveyor nga moproseso unya sa basura.

Matod ni Quisumbing nga dul-an sa P600 milyones ang gastuhon sa Mandaue alang sa pagtubag sa problema sa trapiko ug baha nga sulbaron pinaagi sa paghimo og dugang infrastructure projects ug pag-abli og bag-ong mga dalan.

“We’re improving and opening some of the roads but really, part sa problema nato is

volume sa vehicles. Quite frankly, kuwang gyud ang road networks nato,” ni Quisumbing. Paambit niya nga ang Mandaue aduna lay 35 square kilometers nga dalan maong dali kini mohuot sa bagang dasok sa mga sakyanan nga nag-agian sud ug gawas sa dakbayan.

Duha ka bag-ong mga dalan ang ablihan sa Mandaue sunod tuig gawas sa laing pito ka kasamtangang mga dalan nga palambuon.