Pagtaliwan ni Cardinal Vidal
Nangandam ko sa akong coverage sa pagduaw ni Chief PNP Ronald dela Rosa sa Sugbo sa niaging Miyerkules sa buntag sa dihang nilanog ang balita labot sa kamatayon ni Ricardo Cardinal Vidal.
Human nako nakompirmar kalit nga nanumbalik sa akong panumduman ang daghang higayon nga ako nakaapil og
interview kaniya uban sa mga sakop sa Cebu media. Maihap ra hinuon sa kamot nga nag-inusara ra ko.
Ka usa didto sa Archbishop Palace ug ang ikaduha didto sa Mactan Cebu International Airport. Gipangita nako siya sa airport sa pamasin nga maka kuha og dugang kasayuran labot sa iyang biyahe padung sa Vatican.
Ang diha man gud sa akong hunahuna nga maka kuha ug video sa iyang pag gikan sanglit ang maong biyahe giisip nako nga importante kaayo sa tanang biyahe nga itang gihimo. Nibiyahe si Cardinal Vidal bawon ang mga dokumento nga may labot sa gitinguha nga pagbayaw kang San Pedro Calungsod kaniadto isip Beato. Mao sab ni ang running story sa maong panahon. Ang mga paningkamot sa Simbahang Katoliko nga makabaton og usa ka Santo ang Sugbo. Ug alang nako di puol paminawon si Cardinal Vidal nga mohisgut og balik niini kung makit-an nako siya sa airport. Ang problema kay naka check in na siya unya ang
akong team mao pa’y pagabot. Salamat kay sa matag personnel sa airport nga akong gipangutana kung naka kita ba sila sa Cardinal pulos niyango ug nitudlo kung asa siya nahimutang. Duna pa gyu’y ni- escort namo padung sa iyang nahimutangan. Sa tinud-anay lang kanang airport usa na sa lisod kaayong sudlon kung balita ang imong tuyo. Moagi pa ug proseso tungod sa ka delikado sa maong pasilidad. Pero niadtong tongura wa gyud mi magkalisod bisan gamay hangtod nga akong na- interview si Cardinal Vidal.
MISA DE GALLO
Ang lain nakong mahinumduman nga coverage mao ang iyang gisaulog nga unang Misa de Gallo didto sa lungsod sa Alcantara. Dugay nato pero labas pa sa akong panumduman nga ang Cardinal nangutana nganong daghang unipormadong pulis ang nagpasad sa karsada ug sa tugkaran sa simbahan sa iyang pag-abot.
Ang tinuod mao nideklarar ug red alert ang hepe sa Alcantara Police Station kaniadto nga si anhing Sr. Insp. Bert Abing nga ako sab nga kumpare. Matod niya di siya mosugot nga dunay mopasipala sa Cardinal sama sa iyang nahiaguman sa usa sa mga lungsod kaniadto nga karon ciudad na atol nga siya ang nagdumala sa Misa de Gallo.
Mao nga sa maong Misa de Gallo nay nadistino nga duha ka pulis nga naka sibilyan ug nilingkod atubangan sa altar. Samtang ang mga naka uniporme nagsilbi nga perimeter security. Daw nabag-ohan si Cardinal pero nasabtan ra sab niya ang tuyo sa hepe.