Taken for granted

Kinsa man say di kulbaan? Si Rowell ang akong nakita nga nagpaingon namo ni Abigail? Mitan-aw si Abigail nako kay nakakita sab siya kang Rowell.

“O, basig magpada’a ka na sab sa imong feeling niya, ha, Sandra? Kon makig-estorya siya nimo, ayaw siya pakitaig maayong pagtagad.”

Nagkusmod si Abigail. Naghilom na lang ko kay sa akong pamatyag misamot ang gibati kong kakulba sa pagsulod na ni Rowell sa cottage nga nahimutangan namo ni Abigail. Migawas si Abigail.

Klaro nga naglagot gyud siya kang Rowell kay puwerte niyang kusmora. “Nganong nia ka?” Wa ko sa mood ug wa gani motan-aw kang Rowell. Didto ko motan-aw kang Abigail nga miyaka sa balas ug nag-atubang sa mga nangaligo.

“Nagpalabay ko sa kaguol dinhi ug dihang nakita tika, maong miduol ko nimo.”

“Nagpalabay sa kaguol? Huh! Maguol kaha ka?”

“Wa ko magbakak nimo, Sandra. You know, duna koy giseryusong girl. Gani mabados man siya.

Siya ang babaye nga gusto kong pakaslan. Nanganak na gani siya ug akoy nag-atiman niya sa ospital.

Pero di diay ako ang amahan sa bata.”

Giyam-iran ko si Rowell. “Gaba na kana nimo!” Hilom kong nakaingon.

“Sakit diay ning binuangan ta, uy!”

“Sakit molang! Parehas sa imong gibuhat nako. Gipasakitan ko nimo. Gipalaom ko nimo pero giduwa-duwaan mo lang ang akong love nimo!” Naghilak na gyud ko.

“I’m sorry, Sandra. Karon pa nako natugkad sa akong kaugalingon nga gimahal diay tika sa tinud-anay. Tagai kog laing higayon.”

“Laing higayon? Imo na sab kong ilaron? Ang akong lawas ra ang imong giapas, Rowell”

Nagpanudlo ko sa nawong ni Rowell. Wa na ko makapugong sa akong kaugalingon. Gitulisok ko na gyud siya. “Di na ko mada’a sa imong kabakakon! Please lang, Rowell, pahawa na sa akong atubangan!”

Way tingog si Rowell nga migawas sa cottage. Giumod ko ang akong nawong sa duha ko ka palad. Mibakho ko.

“Nadungog ko ang imong gisulti kang Rowell, Sandra. Salamat nga nahigmata ka na.”

Migakos ko kang Abigail nga miduol diay nako. Unya miginhawa kog lawom. Mitan-aw ko sa gawas sa cottage. Wa ko na makita si Rowell. Nabatyagan ko nga dunay daghang mga tunok nga naibot sa akong kasingkasing.