WESTBROOK GILIHI-AN DAYO'G TRIPLE-DOUBLE

Gisugdan ni Russell Westbrook ang 2017-18 season sa National Basketball Association (NBA) pinaagi sa pagmugna og triple-double, dili na kini ikasurpresa.

Apan ang nakalahi sa Oklahoma City Thunder ning higayuna mao ang yano ra’ng pagmugna sa kasamtangang MVP og triple-double bisan nadugangan na sila og duha ka lig-ong mga haligi.

Nahitabo kini sa dakong kadaugan sa Thunder batok New York Knicks, 105-84, sulod sa ilang balwarte kagahapon sa pagsugod sa ilang kampanya sa bag-ong season.

Sa miaging season, nabuak ni Westbrook ang rekord sa padaghanay og triple-double sa usa ka season ug gawas niini, nag-average sab siya og triple-double.

Masabot kini gumikan kay nag-inusara ra man siyang lider sa Thunder niadtong higayuna.

Apan bisan niabot na sa tugkaran sa Thunder ang sama ni Westbrook nga All-Stars nga sila si Carmelo Anthony ug Paul George, yano ra gihapong nakakulit si Westbrook og triple-double.

Gipangulohan ni George ang kadaugan pinaagi sa iyang 28 puntos, nidugang og 22 puntos si Anthony samtang nitampo og 21 puntos, 16 ka assists ug 10 ka rebounds si Westbrook.

Sa pagpangulo sa ilang kaugalingong Big Three, ang Thunder nakamugna og 12-0 run nga maoy naghatag kanila og 54-42 nga labaw sa halftime.

Human niini. Wala na molingi pagbalik ang Thunder.

Ang Knicks gipangulohan ni Kristaps Porzingis pinaagi sa iyang 31 puntos ug 12 rebounds samtang nihatag si Enes Kanter og 10 puntos.

Apan ang laing nakakuha og atensiyon sa mga duwa kagahapon mao ang paglubong sa Los Angeles Clippers ngadto sa silingan niini nga LA Lakers, 108-92.

Palyado ang unang duwa sa second round pick sa Lakers nga si Lonzo Ball kinsa igo lang nakapugnit og tres puntos ug siyam ka rebounds.

Si Blake Griffin nangulo sa Clippers nga may 29 puntos ug 12 ka rebounds, samtang si Brook Lopez mitali og 20 ug 18 usab ang kang Jordan Clarkson alang sa Lakers.