MILENDO-BUDLER IPA-REMATCH: IBF
Nimando ang International Boxing Federation (IBF) og dinaliang rematch tali nila ni IBF junior flyweight champion Filipino Milan Melindo ug South African Hekkie Budler, basi sa taho sa Rappler.com.
Nagsilbe kining tubag sa IBF sa reklamo sa kampo ni Budler kabahin sa pasangil nga sayop nga gibuhat sa trainer ni Melindo nga si Edito Villamor atol sa away sa duha ka mga boksidor niadtong Septiyembre 16 sa Waterfront Hotel sa Lahug, Cebu City diin midaog si Melindo pinaagi sa split decision.
Sa usa ka suwat nga gipirmahan ni IBF president Daryl J. Peoples nga adunay petsa Oktubre 16, ang IBF mipagawas og reaksyon sa reklamo sa trainer/manager ni Budler nga si Colin Nathan pinaagi sa paggamit sa Rule 5.K. sa IBF/USBA Rules Governing Championship Contests nga nagtugot sa IBF nga momando og rematch.
Lakip sa gireklamo ni Nathan mao ang pagtugot sa referee kang Villamor nga magbutang og substance aron mapugngan ang pag-agas sa dugo gikan sa gisi sa ibabawng bahin sa tuong matag ni Melindo dihang gisusi sa ring physician ang gisi ni Melindo sa 11th ug 12th rounds.
Ang cornerman tugotan lang nga makahimo niini inig human ra sa round ug dili atol sa timeout nga itawag sa referee.
Gihimong basihan sa IBF ang lagda sa Games and Amusements Board (GAB) sa Pilipinas kabahin sa pamaagi atol sa ringside doctor examination nga nag-0ingon: “The Referee will call time out immediately after the bell rings to start the next round. The referee will then assure that the boxer’s corner does not interfere with the examination…”
Alang sa IBF, adunay basihan ang reklamo sa kampo ni Budler hinungdan nga nimando sila og dinaliang rematch.
“After reviewing Mr. Nathans (sic) concerns that we found relevant and the video tape provided to the IBF, [IBF Championships Chairman Lindsey Tucker] and I have determined that by the Referee allowing Milan Melindo’s cornermen to administer a coagulant although-at the recommendation of the Ringside Physician- was inappropriate conduct which has affected the outcome of the fight: as well as violated the rules of the GAB as provided to the IBF,” pamahayag sa IBF. Ang manager ni Melindo nga si ALA Promotions president Michael Aldeguer nakurat sa suwat sa IBF ug alang kaniya, kinahanglan pa kining tukion og insakto.
“We need to appeal the decision as Milan already won that fight clearly and it was an optional defense and not a mandatory,” pasabot ni Aldeguer. Ang laing mga reklamo sa kampo ni Budler gibasura sa IBF./