2 NGA MISSING, GIDAGSA NGA PATAY
MGA BABAYENG NANGINHAS SA LAPU-LAPU GIANOD SA BAYBAYON SA LEYTE
Duha ka mga babayeng nanginhas kinsa na- missing human naabtan og unos sa Sitio Saac, Brgy Buaya, dakbayan sa Lapu-Lapu nakit-an na sa Brgy. Tinag-an, Albuera, Leyte kagahapon, unom ka adlaw sukad sa ilang pagkawala.
Unang lawas nga nakit-an didto sa Lawis-Cabatuan nianang ala 1 pasado sa kaadlawon kagahapon.
Pasado alas 3 sa kaadlawon, si Lando Gonos ang nakakita sa laing lawas.
“Nagsusi ko sa akong sakayan. Pagkita nako, nagtuo ko og baboy kay puti man. Ako unta guyoron og balik sa dagat pero pagkaklaro nako og maayo, naatras ko kay tawo man diay,” matod ni Gonos.
Mitawag gilayon si Gonos sa mga opisyal sa barangay aron ipahibawo ang iyang nakit-an.
Ang mga lawas sa mga biktima positibong giila sa duha ka mga higala niini nga kaubang nanginhas apan naluwas sa dihang miigo ang unos.
Kini gikompirmar sa hinigugma sa usa sa mga babaye nga nanginhas nga si Eliso Abing, 32, taga Brgy. Buaya.
Si Abing hinigugma ni Jenny Rose Tormon, 29,, usa nga nawagtang. Kuyog ni Tormon sa pagkawala niadtong milabayng Dominggo sa hapon mao si Helen Gingco, 25.
Kahagapon, si Abing gitawagan ni brodkaster Bobby Nalzaro sa programa niini sa radyong DySS ug gipadalhan og hulagway pinaagi sa Facebook sa duha ka mga babayeng nakit-an sa baybayon sa Albuera.
Human madawat ni Abing ang hulagway, iya kining gipakita sa duha ka mga higala sa biktima kinsa kuyog niining nanginhas ug didto ilang nailhan nga si Tormon ug Gingco gyud kini pinaagi sa biste.
Katapusang nakit-an ni Tormon nga naka-itom og t-shirt ug ang usa sa mga lawas may itom nga t-shirt nga may “I love Cebu” nga printa.
Hangyo karon ni Abing ngadto ni Mayor Paz Radaza nga katabangan unta siya sa pagpakuha sa patayng lawas ni Tormon ug ni Gingco.
Sa wa pa ang hitabo niadtong Oktubre 15, nanimba pa sila si Tormon uban sa iyang mga higala saw a pa ang insidente.
Pag-uli niini human nanimba, nakadesider kining manginhas maong nag-ilis siya sud sa giabangan niini nga balay sa ilang ka Abing.
Sumala pa ni Abing nga niadtong higayuna, nag-ihap siya sa tigmamiso nga kita niini sa iyang gamayng internetan.
Dugang niya nga kon di pa lang siya busy niadtong higayuna, di unta ingon niadto ang masangputan sa iyang uyab.
Moapas unta si Abing pasado alas 2 sa hapon apan mao kini ang pag-unos maong nipaabot na lang siya ni Tormon sa balay.
Apan wa na mahikuyog si Tormon uban ni Gingco sa duha niini ka mga higala sa pag-uli human sa unos.
Tungod sa kabalaka ni Abing pagka-hapon, siya nanghuwam og tulo ka bangka ug ilang gipangita sila si Gingco ug Tormon apan wa gyud nila kini makit-i.
Dugang niya nga posibleng atol sa unos, si Tormon ug Gingco nasayop og direksyon pagdagan ug napunta sa lawod sanglit niadtong higayuna, matod pa sa mga kuyog niini, zero visibility ang palibot.