Sobrang ‘selfie’ sakit sa utok
Matod pa sa usa ka artikulo nga akong nabasa nga adunay 200 ka mga klase sa mental illness. Ug ang pinaka-grabe mao kanang magsuol-suol ug tumaw sama anang bi-polar, obsessive compulsive disorder ug schizophrenia. Ang uban mentally deranged o boang ug mamahimo nang bayolente. Labi pa og na boang gumikan sa illegal nga drugas. Mao nang didto sa probensiya ang mga tawo nga adunay deperensiya sa utok igaid sa punuan sa doldol.
Ang uban wa makaila anang doldol. Kanang kahoya mo-bunga og gapas o cotton nga isulod sa unlan. Homok man god ang maong matang sa kahoy ug di masakitan ang tawo nga igaid o gapuson sa punuan kay sa igaid sa punuan sa mangga. Ang ubang boang sa probensiya isulod sa tangkal aron dili makapasakit.
Ang mga matang sa mental illness posibleng naa matag usa ka nato pero dili lang siguro grabe kaayo itandi sa akong nahisgutan sa unahan. Kanang pagkalu-uran o kanang narcissism o sobrang bilib sa kaugalingon laing klase pod na. Kanang tawo nga malipay kon masakitan ang iyang mga kontra, lain pod na.
Karong bag-o, nadiskobre nga ang sobrang ‘selfie’ usa ka matang sa sakit sa utok. Mahulog nga narcissism, klase sa tawo gustong kanunay makuhaan og hulagway ang dagway, labi pa og ma-publikar sa social media. Uso naman god ning selfie sa Facebook ug Twitter.
Matod pa sa mga experts nga kon mag-selfie ka og sobra sa katulo ka higayon sa usa ka adlaw posibleng aduna kay problema sa pangisip. Dili hinoon ka boang pero may ‘singko sentimos’ sa ilok.
Matod pa ni Dr. David Veal sa United Kingdom ug sa American Psychiatric Association nga ang kanunay mag-selfie ug i-post sa social media adunay koneksiyon sa sakit sa utok diin ang maong tawo adunay obsession sa iyang personal appearance nga gitawag og body dysmorphic disorder.
Lingaw-lingaw ra ang mag-selfie gamit ang smart phones apan nahimo nauso karon ug posible nga mosangpot sa addiction, sobrang bilib sa kaugalingon ug mosangpot usahay sa pag-suicide. Mao diay nga daghang mga kaso sa suicide karon labi pa sa mga batan-on. Busa kon mag-selfie mo, ayaw palabii kay masaypan mong tulibagbag.