Wa pa mahuman

Daghan ang nangalipay human mapatay ang duha ka mga lider sa mga terorista nga miatake sa Marawi City. Nangamatay sila si Omar Maute ug Isnilon Hapilon sa engkwentro tali sa Army Scout Rangers nga migamit og modernong kahimanan sa gubat. Nakuhaan pa ang lider sa grupo human mapatay ang usa ka Malaysian nga gituohang mopuli unta sa duha.

Apan kining kamatayon sa daghang mga sakop sa Maute ug Abu Sayyaf usa lang ka aspeto sa gubat busa di hingpit nga matawag nga lunlon kadaugan.

Taas ug dugay pa ang gubat tungod kay seguradong duna pay motumaw nga mas bangis nga mga grupo kon di matubag ang mga suliran sa Mindanao.

Ang nag-unang suliran mao ang kakabus nga bunga sa pagpabaya sa nangagi pang mga administrasyon. Kon tan-awon ang nasudnong budget, kanunay nag-una ang Metro Manila samtang kadaghanan sa kabus nga mga lalawigan sa Mindanao pinisik na lang ang madawat.

Gawas sa gamay nga pahat sa nasudnong budget, ang kurapsyon naghitak usab hinungdan nga wa masinati sa yanong katawhan ang serbisyo sa kagamhanan.

Pun-an pa sa inhustisya tungod sa paghari sa dugay nang panahon sa dagkong mga pulitiko nga ang nag-unang tumong mao ang pagpreserbar sa ilang liderato.

Naa pa ang pagtan-aw sa ubang mga komunidad nga kanunay lang silang naa sa daplin, wa giapil sa pagpanday sa kalambuan sa ilang tagsa ka dapit.

Kon di maayo ang pagpabangon sa Marawi City ug matubag ang panginahanglan sa mga apektado, motumaw ang lain pang mga grupo nga maoy mopuli sa nangamatay.

Tuod nangamatay hapit tanan sa mga terorista, apan ang propaganda nga nagkuhit sa emosyon sa ilang mga kabanay ug kahigalaan, posible kaayong modagkot sa laing kagubot.