Daghan kaayog nahimo
“Unsa may akong mahimo?” maoy kinaham nga mga pulong sa kanhiayng Arsobispo sa Sugbo nga si Ricardo J. Cardinal Vidal nga mipanaw niadtong Miyerkoles Octobre 18 sa pangilin ni San Lucas.
Mahimo ning sabton sa daghang perspektibo depende sa tono sa tingog. Mahimong wa nay mahimo o mahimo sab nga usa kini ka mapaubsanong pagtugyan sa kahimtang nga giatubang ngadto sa mga kamot sa Dios. Binasi sa mga nahimo ni Cardinal Vidal morag sagad ang ikaduha ang gipasabot niini bisan pag dili dayon masabtan.
Sa panahon sa EDSA 1 si Cardinal Vidal ang nangulo sa mga Obispo sa Pilipinas sa pag-ila nga ang pagpadagan sa “snap
elections” dili makatarunganon. Siya usab ang miadto sa Roma aron pagpatin-aw sa maong baruganan. Apan siya usab ang miduaw ni Marcos sa dihang kini himalatyon na sa Hawaii. Sa dihang nagkagubot ang Pilipinas sa panahon ni Estrada siya ang nagkombinse kaniya nga mokanaog gikan sa poder. Apan siya usab ang nagkombinse kang Arroyo sa paghatag og “presidential pardon” kang Erap.
Daghan pa tag mahisgotan mahitungod kang Cardinal Vidal sama sa iyang pagkasuod kang San Juan Pablo II, sa iyang pagduso sa proseso nga miila nga santo si Pedro Calungsod, ug uban pa. Sa akong bahin, mahinumdom pa gyod ko sa iyang pagpangutana kanako mahitungod sa kahimtang sa “impeachment” ni Chief Justice Davide ug sa iyang paghimo og baruganan mahitungod niini.
Siya pod ang unang Obispo nga mingboluntaryo pagduyog Binasi sa Isaias 45:1,4-6; Salmo 96; 1 Tesalonica 1:1-5; ug Mateo 22:15-21 sa pundok sa Dilaab nga nakighinabi atubangan sa CBCP mahitungod sa paghatag og mga seminar sa PNP. Sa dihang gisugdan nato ang gitawag nga VLS kun Values and Leadership School diri sa Sugbo niadtong 2005, si Cardinal Vidal ang giduol sa PNP.
Gihisgotan diha sa ebanghelyo ni Mateo ang tubag ni Jesus sa lit-ag nga gihimo sa mga Pariseo: “…ihatag sa Cesar ang iya sa Cesar ug ngadto sa Dios ang Iya sa Dios.” Dili kini mahitungod sa gitawag nga “separation of Church and State” kondili sa pag-ila sa natad sa Dios ug sa pangagamhanan. Apan kon aninawon gyod nato, ang natad sa Dios milakip usab sa natad sa pangagamhanan kay ang hustisya nagagikan man sa Dios.
Makita ni nato sa libro ni Isaias nga naghisgot mahitungod kang Hari Ciro nga “pinili” sa Dios nga naglig-on kaniya bisan pag wala siya makaila sa Dios. Aduna diay plano ang Dios sa pangagamhanan ug gihatagan niya kini sa iyang kinaadman ug gasa. Gipaambit pod sa Dios ang mga anaa sa poder og pagtuo, paghigugma, ug paglaom, nga gihisgotan ni San Pablo sa sulat sa mga taga Tesalonica mahitungod sa iyang mga kaabag sa misyon.
Daghan sa mga nahimo ni Cardinal Vidal o Tatay Carding – usa ka pamarayeg nga titolo – adunay kalambigitan sa pagabay niya sa mga tawo sa poder nga nanginahanglan og giya. Pinaagi sa iyang pahiyom, pagkakalma, kinaadman, ug pagkamaampuon, daghan kaayog nahimo ang Cardinal.
Daghan kaayog salamat, Cardinal Vidal. I-ampo mo kami. Magkita lang nya ta, puhon.