Kalidad sa kinabuhi
Kon taga Cebu City ka, dako ang purohan nga daghan sa mga dapit dinhi ang wa nimo maadto o maagii. Bisan gani ako nga taga Bacayan, usa sa mga sikbit nga barangay sa Talamban, daghan sa kabukiran ang wa nako maadto sukad sa bata pa ko.
Ako rang nadunggan ang Barangay Guba, Paril, Adlawon, Agsungot, Lusaran ug uban pa. Dihang nag mountain biking na ko, naabot ko na ning mga lugara. Salamat sa akong mga higalang sila si Embet Entice ug Ramon Villamor nga maoy magsige og galgal nako.
Daghang mga karsada sa Mandaue ug Cebu City ang wa pa unta nako maagii apan dihang nagsige na ko og sikad, akong nasuot ang daghang mga agianan nga wa nako mahibaw-i nga naglapos lapos ra diay.
BENTAHA
Ang akong anak nga kamaguwangan ug ang akong kamaguwangang babaye, maoy magsige og biseklita kuyog nako ug sa ilang mga higala. Daghan usab sila og naadtoang mga lugar nga wa nako maduaw sukad sa bata pa ko. Mao nga dako ko og pagsalig sa akong mga anak nga magsuroysuroy, kay nakahibawo ko nga nakatultol sila sa ilang giadtoan.
Mao na ang nakabentaha kon ang imong anak nakakuyog sa mga sikad. Masuhito sila sa mga lugar ug makahibawo sila unsay maayo ug unsay kuyaw nga agian.
Wa gani ko makahibawo nga ang akong mga anak daghan na og nahiadtoang mga lugar kay bisan ang among kamanghuran, nisulti nga nakaduaw na sila sa pipila ka mga lugar nga naglakaw lang kay di pa siya makaabot sa MTB. Kuyog niya ang iyang mga kuya pagsuroy.
MAS MAAYO
Ang biking usa sa mga maayong kalingawan sa pamilya, di ba? Mas ganahan ang mga bata niini, labina kon medyo lagyo ang adtoan. I mean, lagyo kanang 6-10 kilometers gikan sa balay, dapit nga wa pa nila maadtoi.
Kasagaran ron sa mga bata naa lang mag-atubang sa mga gadget ug telebisyon. Lahi sa amoa nga panahon nga ang mga bata, bisan motan aw pa og mga telebisyon, apan daghan og mga panahon sa pagduwa. Di na bitaw ikahibung karon nga batan-on pa, duna nay mga sakit nga masinati lang unta sa pagkahamtong na kun 40 anyos pataas.
Naa gani giatake sa kasingkasing sa edad pa lang nga 26. Makakugang ni kon wa ta makahibawo nga karong panahuna, sagad sa mga batan-on nagsalig sa fastfood.
Busa, mas maayong mabuang sa biseklita ang mga bata kay pinaagi niini, mahabwaan ang toxins nga naa sa sud sa ilang lawas.