GIPAAGI SA KUHA, HATOD
Nagsugod isip managhigala sila si Jennifer “Iping” Amancia ug Elmer Mirandilla hangtod nahimong manag-uyab.
Dul-an sa unom ka tuig nga relasyon, ang duha nanumpa atubangan sa altar sa kaminyuon niadtong miaging buwan.
Ang ilang sugilanon naumol sa Music Ministry sa Youth Ministry sa Catholic Charismatic Renewal Movement sa Santo Tomas de Villanueva Parish, dakbayan sa Sugbo diin sila pulos mga miyembro.
Sila si Elmer ug Iping maoy tigkanta sa ministry, usahay si Elmer mahimong gitarista.
Kon magpraktis, usahay si Elmer ang mokuha ug mohatod ni Iping gikan ug pauli sa balay. Sa sige og kuha'g hatod, na- develop ang pagbati ni Elmer ug gipangayuban ang dalaga.
Ang 29-anyos nga ginang niangkon nga upat ka ulitawo ang dungan nga nanguyab niya. Apan si Elmer, 26, ang iyang gipili.
“Kay kugihan man siya ug naning gyud moserbisyo sa Ginuo,” pag-angkon ni Iping kon nganong si Elmer ang iyang gisugot.
Sila opisyal nga nagkauyab niadtong Nobiyembre 30, 2011.
Sa sinugdanan, wa ganahi ang pamilya ni Iping kang Elmer kay way trabaho.
Apan sa gipakita ni Elmer nga seryuso kang Iping ug sa sige og pamisita, nadawat na kini sa pamilya sa babaye.
Nganong gibarugan niini ang iyang gugma alang kang Iping?
“Kay naa na ni Iping ang tanang (qualities) nga akong gipangita sa babaye. Bisan og maldita siya, love gihapon nako siya,” dali nga tubag ni Elmer sa Superbalita Cebu.
Duha sa mga hiyas nga ganahan ni Elmer kang Iping ang pagkamanggihatagon ug pagkamatinabangon.
Bisan sa mga pagsulay sa ilang relasyon, ang duha nagpabilin nga lig-on.
Sila nahiusa sa sag sa kaminyuon niadtong Septiyembre 8, 2017 sa samang simbahan.
Natuman ang ilang kasal uban sa tabang sa mga tawo sa ilang palibot, apil ang kamaguwangan nga igsuon ni Iping nga si Lucille Amancia, giila nga ate sa
ministry nga si Nelly Babatuan, kauban sa choir nga si Alexie Abaya ug mga kauban nila sa kapunungan sa simbahan. /