KYRIE, CELTICS MINGDAOG NA
Mingbangon gikan sa duha ka sunodsunod nga kapildihan si Kyrie Irving ug ang Boston Celtics ug ilang gipahimungtan ang host Philadelphia 76ers, 102-92, kagahapon sa National Basketball Association (NBA).
Human sa mangil-ad nilang pagsugod sa 2017-18 season diin nasubhan sila og kapildihan batok sa Cleveland Cavaliers ug Milwaukee Bucks unya nawagtang pa gyud ang usa sa ilang mga sinaligan nga si Gordon Hayward, ang Celtics naghugpong aron iposte ang labing una nilang daog sa season.
Si Irving, kinsa nakadesisyon nga mobiya sa Cavaliers aron makahimo og kaugalingong gingharian sa Celtics, nipagawas og senyales kon nganong siya ang lider sa bag-o niyang team.
Ang All-Star pointguard nagpakatap og 21 ka mga puntos lakip na niini ang krusyal sa hinapos nga bahin aron pangulohan ang kadaugan samtang ang laing bag-ong sakop sa Celtics nga si Al Horford niamot og 17 puntos.
Maayo sab nga nakaduwa alang sa Celtics mao sila si Jayson Tatum ug Terry Rozier III nga nagkumboya og 20 puntos.
Gikan sa panagtabla, ang Celtics nipabuto og 11-4 run sa hinapos nga bahin sa 4th quarter aron pagmugna og agianan paingon sa kadaugan.
Si Joel Embiid, kinsa nalimitahan lang og 31 ka mga duwa sa nag-una niyang duha ka seasons sa 76ers gumikan sa angol sa iyang tiil, dili maayo’g gipakita sa iyang pagbalik og duwa.
Igo lang siyang nimugna og 11 ka mga puntos sa 4-of11 shooting nga usa sa labing ngil-ad niyang duwa sukad sa iyang pag-abot sa NBA.
Nasipyat si Embiid sa naguna niyang walo ka mga itsa. Namugna niya ang labing una niyang puntos sa duwa sa ulahing bahin sa 3rd quarter.
Bisan sa bati nga duwa ni Embiid, ang 756ers nakapanghudlat gihapon og insakto sa Celtics apan ningbahar ang ilang duwa sa hinapos nga bahin.
Alang kang Irving, daghan pang kinahanglang makat-unan ang Celtics isip usa ka bag-ong puwersa una sila maandam sa mas dagko pang kombati nga ilang pagasagu- bangon sa umaabot.
“We’re figuring out a lot of newness,” asoy ni Irving. “It’s not always going to be perfect.”
Sa laing mga duwa, gipangmakmak sa Cavaliers ang Milwaukee Bucks, 116-97, gipangpukan sa defending champions Golden State Warriors ang New Orleans Hornets, 128-120, gipanglmapornas sa Charlotte Hornets ang Atlanta Hawks, 109-91, gipangbuntog sa Washington Wizards ang Detriot Pistons, 115-111, gipanglubong sa Portland Trail Blazers ang Indiana Pacers, 114-92.
Gipanglupig sab sa Brooklyn Nets ang Orlando Magic, 126121, gipangpukan sa Minnesota Timberwolves ang Utah Jazz, 100-97, gipangkulata sa Sacramento Kings ang Dallas Maverics, 93-88, samtang gipatapsingan sa Los Angeles Lakers ang Phoenix Suns, 132130.