55T NANAMILIT KANG VIDAL

GIISIP NGA USA SA LABING DAKONG BURIAL PROCESSION SA NASOD

Labing minos 55,000 ka mga tawo ang ninghatod sa lubong ni Cebu Archbishop Emeritus Ricardo Cardinal Vidal nga gihulagway sa kapulisan nga malinawon sa kinatibuk-an.

Gihulagway nga usa ka tribute isip Sugboanong bayani ang nahitabo kang Cardinal Vidal atol sa funeral procession.

Giisip nga usa sa labing dako nga funeral procession sa nasod ang nahitabo kagahapon tungod sa kadaghan nga nisaksi niini.

“Simple apan makahuloganon,” mao kini ang paghulagway sa tigpamaba sa Archdiocese of Cebu nga si Msgr. Joseph Tan human sa funeral procession. Buntag pa lang gipakatap na ang kapin sa 800 ka mga pulis inabagan sa mga nitabang sa Cebu City Police Office alang sa pagpatuman sa hugot nga siguridad.

Wa mokompyansa ang hepe sa CCPO, Sr. Supt. Joel Doria, nga bisan duna nay igong gidaghanon sa mga pulis nga nagbantay sa rota sa agianan sa prosesyon, iya pang gimandoan ang mga police station sa paglusad og checkpoint.

Alas 7 na sa buntag giablihan ang ganghaan sa Cebu Metropolitan Cathedral ug gitugotan nga makasulod ang mga tawo nga gustong mosaksi sa haya sa cardinal.

Gisiksik ang matag usa kanila isip kabahin sa pagpatuman sa hugot nga siguridad sulod sa simbahan.

Alas 10:30 sa buntag gisugdan ang funeral procession nga gikuyogan sa bagang duot sa katawhan ug ning mga gutloa gihulagway sa kapulisan nga misaka ang gidaghanon sa mga tawo.

Gisunod ang plan B kagahapon diin niagi kini sa Osmeña Blvd., D. Jakosalem st., Colon st., paingon sa dan Mabini, pabalik sa Burgos hangtod sa P. Gomez diin nahimutang ang mausoleum.

Dugang niini nga gikapakita sa mga Sugboanon ang “katapusang buhat sa pagtahod” kang Vidal.

“Makasingkasing ang atong pagsalmot niini ug paghalad niini alang sa kapahulayang dayon ni Cardinal Vidal,” si Tan nagkanayon. Hingpit nga nagsugod ang

procession kagahapon sa alas 10:30 sa buntag ug nahuman sulod sa 50 minutos.

“Ma- proud ta as Cebuanos (tungod) atong napakita sa tibuok kalibutan nga kahibawo ta mahigugma, maantigo ta mahigugma sa nahigugma nato.”

Atol sa procession, anaa lang sa kilid ang mga tawo apan dihang niagi na ang carozza ni Vidal, nisunod kini. Mas napaspas ang maong

procession tungod kay wa nidumog ang mga tawo.

Samtang si Konsehal Dave Tumulak, deputy mayor for

police matters, nagkanayon nga niabot sa 25 ka tawo ang natala nila nga nagpakitabang tungod kay nakasinati og lisod sa ginhawa, nakuyapan ug uban pa.

Wala’y dagkong mga kakulian ug nagmalampuson sila sa pag- secure sa lugar.

Aron pagsiguro sa siguridad nagpalupad og mga drone ang CCPO diin makita ang lihok sa tanang mga tawo nga minunot sa prosesyon gikan sa simbahan hangtod na sa pagbalik sa agi niini.

“Generally peaceful yung over all, at base duon sa estimate ng CCDRRMO umabot sa 55 thousand ka tao,” matod ni Doria. Wa makadawat og report ang kapulisan nga dunay mga bata nga nangawagtang Gawas sa mga pulis ug force

multipliers, ning-abag usab ang mga sundawo gikan sa Central Command ug nagdala sila og mga canine unit nga maoy misusi sa kadudahang mga butang nga ibilin sa usa ka lugar. /