MAUSOLEUM SIRHAN SUD SA 5 KA ADLAW

Ang tagdumala sa pagayumayom sa Mausoleum of the Bishops sa Cathedral, Fr. Brian Brigoli, nitug-an nga sirhan og lima ka adlaw ang inner ug outer chamber sa mausoleum nga gilubungan ni Archbishop Emeritus Ricardo Cardinal Vidal.

Karong adlawa, gitumbok ni Brigoli nga buksan kini alang niadtong mga magtrabaho sa pagselyo sa lubnganan.

Karong adlawa ibutang ang concrete slabs nga maoy moduot sa lungon ni Vidal sa yuta ug iinstalar sa bunya ang permanenteng tabon sa nitso.

Kagahapon, temporaryo nga nitch cover lang ang gitabon sa lubong.

Matod ni Brigoli, ginama kini sa tiles.

Ibabaw sa nitso, makita ang pirma ni Vidal ug ibabaw niini, anaa ang coat of arms sa mga cardinal ug usa ka cross.

Dunay gi-order nga usa ka slab sa marmol (marble) aron maoy himuong permanenteng tabon sa lubong, sama sa kang Julio Cardinal Rosales, nga unang gilubong sa susamang mausoleom niadtong 1983.

Human unya sa lima ka adlaw, di pa makasiguro si Brigo- li kon buksan na hingpit sa publiko ang burial chamber.

Hinuon matod niya, posibleng ang outer chamber lang ang ablihan, diin makasudong diha sa glass door sa inner chamber ang mga buot motan-aw sa lubong.

Di pa siya kapaniguro kanus-a ablihan ang inner chamber o mismo ang dapit diin gilubong si Vidal.

Kon buksan ang outer chamber sa mausoleum, magbutang unya sila og candle stand alang sa mga maghalad og kandila sa namatay nga cardinal ug security personnel aron pagsiguro sa seguridad sa dapit. /

/ ARNI ACLAO GISIRHAN: Human matunod ngadto sa lubnganan ang haya ni Archbishop Emeritus Ricardo Cardinal Vidal, gisirhan na kini. Sud sa lima ka adlaw, trabahuon ang mausoleum hinungdan nga sirhan usab kini gikan sa publiko.