Unsay tambag ni Vidal kang Villarojo

“Ayaw pangaway ni bisan kinsa, pagkat-on og pagpugong sa kaugalingon ug atimana ang kaigsuonang mga pari,” ang dili makalimtan nga mga pulong ni Cebu Auxiliary Bishop Dennis Villarojo gikan kang Cebu Archbishop Emeritus Ricardo Cardinal Vidal.

Kini samtang si Manila Archbishop Luis Antonio Cardinal Tagle niawhag sa mga Sugboanon nga ipadayon ang pag-asoy sa mga sugilanon sa kinabuhi sa cardinal bisan kon kini namatay na.

Tulo ka mga cardinal, dul-an 40 ka mga obispo ug gatosan ka mga pari ug madre ang nitambong sa misa requiem ug katapusang kapahulayan ni Vidal kagahapon sa mausoleum sa Cebu Metropolitan Cathedral, dakbayan sa Sugbo.

Sa iyang wali, si Villarojo nipaambit nga dili niya makalimtan ang mensahe ni Vidal atol sa wali niini sa iyang instalasyon pagka obispo niadtong Agusto 2015 nga dili mangaway sa mga madre.

“Ayaw pangaway sa mga madre. Ayaw pangaway ni bisan kinsa kay basin ang imong giaway karon mao ra nay makatabang nimo sa umaabot,” paambit ni Villarojo sa iyang wali.

Si Villarojo nagsilbi nga personal secretary ni Vidal gikan sa 1994 hangtod sa 1998.

Siya nisaysay nga sa 13 ka tuig nga gihatag niini ngadto sa namatay nga cardinal, wala kini makadungog nga namalikas si Vidal bisan kon nasuko na kini.

“Apan molagom lang ang imong nawong, klaro kaayo nga ikaw nasuko. Apan ang pulong nga mogawas ra gyud sa imong baba mao ang ‘pambihira’,” dugang asoy ni Villarojo.

Dili usab niya makalimtan ang gisulti ni Vidal nga dili pun-on ang tiyan kon mokaon ug magbilin og luna kay moinom pa kini og tubig.

Siya nidugang ang katapusang mga pulong sa cardinal nga iyang gikonsiderar nga labing mahinungdanon alang niya dihang nakasulti kini sa iyang pinuy-anan sa Santo Village sa Barangay Banilad, siyudad sa Sugbo, mao ang atimanon ang iyang kaigsuonang mga pari.

Samtang, sa iyang pakigpulong, si Tagle namahayag nga ang kamatayon dili katapusan base sa Kristohanong pagtuo. “In death life becomes complete,” dugang sa arsobispo sa Manila.

Iyang giawhag ang mga Sugboanon nga ipadayon ang mga sugilanon sa kinabuhi ni Vidal isip kasaulogan sa pagkakumpleto sa kinabuhi sa maayo ug bantugan nga suluguon sa simbahan.

Si Karen Vidal-Rafanan, pagumangkon nga babaye sa Cardinal nga anak sa manghod

niini nga si Juanito, naghilak nga nagpasalamat sa mga Sugboanon sa gipakita nga gugma ug pagpangga sa iyang uyoan.

“We will always miss his smile...his laughter...his sense of humor... We all lost a father, a brother, a confidant, an adviser,

a leader, a man of God,” pamahayag sa ginang sa iyang pakigpulong sa wala pa ang misa.

Siya niingon nga nabati ug nakita nila ang paghigugma sa mga Sugbuanon sa iyang namatay nga uyoan

Samtang, giila sa Apostolic Nuncio sa nasod, Bishop Gabriele Giordano Caccia ang daghang atampo ni Vidal sa simbahan pinaagi sa suwat nga gibasa sa secretary niini nga si Msgr. Gabriel Viola iyang representante sa misa.