LIBOAN MIHATOD NI CARDINAL VIDAL SA LUBNGANAN
Malinawaon, Han-ay. Puno sa emusyon.
Mao kini sumada nga paghulagway sa pagpahiluna sa iyang kataposang kapahuwayan si Cebu Archbishop sa Emeritus Ricardo Cardinal Vidal kagahapon sa buntag.
Gitambongan sa liboan sa mga miyembro sa Simbahang Romano Katoliko, bisan ang mga lider sa ubang relihiyusong grupo, gikan sa nagkalainlaing hut-ong ug sektor sa katilingban.
Gawas nga gideklarar ni Presidente Rodrigo Duterte nga holiday ang tibuok Sugbo kagahapon, espisyal usab sa mga lokal nga media ang paghulagway sa kataposang higayon sa lider sa simbahan nga kanunay abli sa mga pakighinabi sa media.
Sa pagyukbo sa mahal nga Cardinal, ang SunStar Cebu, Superbalita Cebu ug SunStar Networl Exchange nimugna og team nga nagsubay sa kalihokan aron paghatod nga linawas sa dagan sa seremonyas pinaagi sa SunStar online ug mas malangkubon nga pasaysay sa mga istorya nga migawas sa atong mantalaan.
Ang team sa mga magsusuwat gilangkoban nila ni Justin K. Vestil, Razel V. Cuizon, Johanna Marie O. Bajenting, Herty B. Lopez, Sheila C. Gravinez, Arnold Y. Bustamante (correspondent), Astra Zina D. Logarta (correspondent), ug Philip A. Cerojano.
Ang team sa photographers mao sila si Alex Badayos, Allan Cuizon, Allan Defensor, Arni Aclao ug Alan Tangcawan (correspondent), kinsa mao ang nagkuha sa pipila ka mga hulagway ning pahina.
Ang SunStar team nibaliwala sa kainit sa adlaw ug bagang duot sa katawhan sa paghatag sa labing ulahing kasayoran alang sa mga suking bumabasa ug labaw sa tanan, ang pagmahal sa Cardinal.
Adios, Cadinal Vidal.