Tapak nga solusyon
Nagtukod ang Cebu City Government og quick response team alang sa baha nga giuyonan usab ni Mayor Tomas Osmeña. Ang lakang gihimo human sa sunodsunod nga kalit nga pagbaha sa nanglabay nga mga semana. Nganong tukuron pa man ang team nga ang suliran sa baha wa magkinahanglan og tagi-tagi nga tubag, kon di kanunay nga pagpangandam, medium ug long term nga kasulbaran.
Limpyuhan ra ba diay ang mga kanal panahon sa pagbaha o ting-uwan? Di diay kini buhaton kanunay?
Di usab gimbuhaton sa Siyudad ang pagsulbad sa mga suliran nga makaya ra unta sa barangay level. Ang paglimpyo sa mga kanal makaya ra sa barangay nga di kinahanglan pang manghilabot ang Siyudad.
Mas suhito usab ang mga lumolupyo sa matag barangay sa ilang drainage system nga naa sulod sa ilang komunidad. Mas madasigon usab silang manginlabot sa suliran kay sila ang direktang apektado.
Malikayan na usab ang pagpataka og labay sa mga sagbot nga maoy makasampong sa mga kanal kay sila ang mga hingtungdan.
Unta, ang labing maayong buhaton nila ni Konsehal Jerry Guardo mao ang pagpakigsulti sa mga barangay kapitan nga kadaghanan iyang mga higala isip kanhi usa kanila.
Iyang kuhaon ang ilang kooperasyon uban sa hingtungdan nga mga komunidad.
Ang nahitabo man gud karon, bisan sa suliran sa baha ug basura, naghari gihapon ang pulitika. Mao na nga ang pagsulbad sa mga problema, pat-ak pat-ak.
Sama ra gud na sa mga karsada, ang pag-ayo tapak tapak ra usab sa mga libaong.
Mao nga di na ta angay mahibung, sa nagkayamokat tang sitwasyon.