Morag mayor pod
Gikiha ni kanhi National Bureau of Investigation regional director Florencio Villarin ang “kanhi laos nga pulitiko,” Bise Mayor Edgardo Labella ug ang mga konsehal nga gi- appoint isip mga deputy mayors. Gipasaka ang kasong administratiba ni Villarin sa buhatan sa Ombudsman. Matod pa ni Villarin nga dakong kasupakan sa Konstitusyon, Republic 7160 kun Local Government Code ug Republic Act 6713 kun Code of Conduct and Ethical Standards for Public Officials and Employees sa pagtudlo sa mga konsehal nga mohimog executive functions.
Gi-apil niya si Labella bisan kon way labot sa pagtudlo sa maong mga konsehal kay wa makabadlong sa kanhi laos nga pulitiko sa pagtudlo kanila ug pagdawat sa maong posisyon. Pero para nako unsa may mahimo ni Labella nga dili man maninaw og advise ang kanhi laos nga pulitiko? Iya ra nang kaugalingong kabubut-on ug desisyon. Ang mga konseihal mga kaalyado man sa Bando Osmeña Pundok Kauswagan (BOPK).
Dugay na kining maong isyo. Ambot kon gitapulan ba kanang “kanhi laos nga pulitiko” kay iya mang gisangunan ang uban niyang kaalyadong mga konsehal. Pero di ako mo-sentro sa akong opinyon kon legal o illegal ba. Iya na kana sa Ombudsman.
Ari ko mo-sentro sa gahum ug inpluwensiya aaning gi- appoint. Matod sa kanhi laos nga pulitiko nga di daw illegal ang pagtudlo kanila kay dili sila mopirma og cheke ug maka- disburse sa ilang gasto. Wa nay problema. Pero ang gahum ug inpluwensiya nila?
Tan-awa si Konsehal Dave Tumulak, deputy mayor for police matter. Giganahan sa iyang posisyon kay mora na usab siya og police officer. Siya maoy magpa- presscon kabahin sa isyo sa kapulisan, jail management ug disaster. Makamando na god siya og police officers.
Samtang si Konsehal Mary Ann Delos Santos, kinsa deputy mayor for Cebu City Medical Center (CCMC) ug hospital services, lingaw usab. Modiktar na god sa chief of hospital sa CCMC ug mangasaba na sa doctors ug nurses. Ilang gigamit ug gipahimuslan ang ilang pagkamayors. Ilang gamiton ang ngalan sa mayor alang sa ilang personal nga katuyuan. Mag-mayor-mayor pud sila.