Peke nga mga tambal

Dihay usa ka iligal nga laboratory nga nanghimo og illegal

health products ug mga tambal ang gironda sa kapulisan. Nagtuo ako nga daghan kini silang mga iligal nga manghimuay og pekeng tambal dinhi.

Kini sila maoy kinahanglang pahamtangan og bug-at nga silot tungod kay kinabuhi na sa mga tawo ang maapektuhan niini.

Kadaghan na kita makadungog nga adunay mga peke nga tambal nga gipamaligya sa mga botika. Wa kitay alamag kon unsaon nato pag-ila kining mga peke. Misalig lang kita sa mga namaligya niini nga tinuod gayud kining maong mga tambal nga atong mapalit sa mga botika.

Pagka-alaut sa makapalit niining maong mga hinimu-himo lang nga antibiotics ug mga tambal sa mga grabeng sakit kay inay maayo madali hinuon kinig mabalhug sa menteryo.

Kadtong atong gidudahan nga gikan sa China ang mga

fake drugs ug medisina dia diay Made in the Philippines. Kon makabuang kining shabu ug ubang illegal drugs makamatay usab kining peke nga mga tambal.

Kinahanglang higpitan sa Food and Drug Administration sa Department of Health ang ilang monitoring batok niinng iligal nga mga laboratories.

Mibukal na ang kaldero sa pulitika. Dinhi sa siyudad sa Sugbo aduna nay giparesang mga partido alang sa pagka-mayor ug pagka-bise mayor.

Sumala pa nga sa Bando Osmeña-Pundok Kauswagan (BOPK) si Mayor Tomas Osmeña modagan pagbalik ug parisan siya ni Konsehal Mary Ann delos Santos. Sa Barug si Bise Mayor Edgar Labella maoy standard bearer o iyang bise mao ang usa ka Rama. Nganong magpathrilling pa man gyud? Si Konsehal Edu Rama ba o si Mike?

Suma sa akong gihisgutan sa miagi nakong mga lindog nga lisud modaug si Mike samtang di pa bakwion ni Presidente Rodrigo Duterte ang iyang pagtawag kang Rama nga nalambigit sa ginadadiling drugas. Kon mamugos siya pagdagan pagka-mayor mao kini makabungkag sa pundok Barug.

Didto sa kaulohan gipahibawo na ni Senate President ug PDP-Laban head Koko Pimentel ang iyang intial lineup pagka-senador.

Nagduda usab ang katawhan nga kining pundok nga gilusad ni Davao City Mayor Sara Duterte preparasyon kini sa iyang kandidatura sa umaabot nga national elections. Dili motuo ang kadaghanan nga modagan lang siya pagka-kongresista sa Davao City kon dili pagka-senador o kaha pagka-presidente puli sa iyang amahan.

Samtang ang oposisyon usab pinaluyuhan sa mga walhong pundok ang naghimo nag daghang mga kahugpungan. Ako nagtuo nga pamulitika na usab kini.