Paul Salas sa Country Mall
Karon na gyung Sabado ang koronasyon sa labing unang Binibining Cebu. Nindot ni nga tanawon kay makita ang katag kon kinsa sa 54 ka mga kandidata nga nagrepresentar sa mga lungsod ug dakbayan sa lalawigan sa Cebu ang makalangkat sa korona.
Adto himoon ang pagpili sa Pacific Grand Ballroom sa Waterfront Cebu City Hotel & Casino. Kitakits!
Ang artistang si Paul Salas, usa sa mga bida sa teleseryeng “The Good Son” sa Kapamilya Network, ang molingaw ug makighimamat sa mga mamamalit sa Gaisano Country Mall karong Martes, Oktubre 31, 7 p.m.
Kini atol sa paglunsad sa A Million Thanks raffle promo diin tulo ka mga bag-ong Mazda cars, 30 ka 55” LED TV sets, 30 ka 8 cu.ft. refrigerators 30 ka 5.2 kg. nga washing machines ug 90 ka 18” stand fans ang ipanghatag.
Ang makapalit og balor P500 sa Gaisano Main, Country Mall, Balamban, Bogo ug Moalboal Town Center makaangkon og raffle ticket para sa gitakda nga mga bola.
Sa akong nahinumduman, ikaduha pa kining higayon nga nitanaw kog balik og pelikulang Pinoy. Ang una mao ang Tanging Yaman ug karon ang Seven Sundays. Maayong pagkahan-ay sa mga papel sa mga anak ni Ronaldo Valdez nga, syempre, maayo kaayo modala. Kinahanglan pa hinoon nga magpaniwang pa si Aga Muhlach.
Lingaw ang esenang nakig-showdown sa sayaw sila si Aga, Dingdong Dantes ug Enrique Gil batok ni Ryan Bang. Gituyo ba kaha nga mag-uban ang tulo nga maayong manayaw o nahunahunaan na lang kini samtang nagsige nag syuting?
Wala diay kunoy leading man si Kim Chiu dinhi sa The Ghost Bride? Syempre, daghan siyag kauban pero wa kuno siyay palalab sa istorya.
Ipasalida na kini karong Miyerkules, Nob. 1. Akong atangan ug klarohon kon panington ba ang akong palad ug lapalapa sa kahadlok.
Nalingaw ko sa pelikulang “Thor: Ragnarok” tungod sa istorya (may mga kontra ni Thor kanhi nga nakig-abin na niya), nindot nga mga visual effects ug sa nahitabo ni Thor dihang nadakpan siya ug diin giputlan ang iyang taas nga buhok.
Mas angayan hinoon siya. Patas-on kahag balik ni Thor ang iyang buhok o sige na siyang magpatupi? Haha!