Gusto og puti
Dear Papa Joe,
Tawga lang ko sa ngalan nga Japeth, taga Negros pero naa karon sa Cebu nagtrabaho isip usa ka tindero kay wa man ko kapadayon og college tungod sa kalisod sa kwarta.
Taas ko na pagka lalaki, mga 6 feet na gani ko ko kapin ug daghan sad nag-awhag nako nga mag varsity pero moarag lisud man ko ma- scout kay probinsyano ko. Pero di gyud ni mao akong concern. Gusto ko maminyo og foreigner ug kataw-an lang ko sa akong tiyo kon maghisgot ko ana bisan karon nga nasayod siya nga may ka chat ko nga Amerikana. Iya kong bugalbugalan kay di daw pwede o tagsa ra mahitabo nga magka gusto ang tisay nako kay di sad daw ko gwapo.
Tinuod di ko gwapo pero ambot gusto ko makaasawa og foreigner ug maka adto sa ilang lugar palayo sa mga tawo nga mabiaybiayon kaayo. Paminaw nimo naa kahay chance maminyo ko? Palihug tambagi ko.
JAPETH
Japeth,
O oi, naay chance basta gugma na ang molihok. Dili sa ingon nga di ka gwapo, di na lang sad ka pansinon. Pero mag depende na sa klase sa amerikana ha kay kon pang sine imong gipangita, basin di ikaw ang gipangita. Pero sa ngalan nga Amerikana, kon naa na sa atong atubangan, tisay na na labi na nga bagay kaayo ang ilang lawas sa ilang katas-on.
Wa gyud ta masayod , daghan na nga viral nga video na ana nga nagkahigugmaay ang duha ka managlahi og kaliwat. Pero kon imong tuyo para lang makagawas o moasenso, basin ihikaw ni sa Labawng Makagagahum. Mao nga kinahanglan kinasingkasing imong pagpangayo. Salamat.
PAPA JOE