Someday I’ll be yours

Nagdala sab og mga kandela si Samuel. Iya kining gidagkotan og giugbok sa atubangan sa nitso ni Rey.

“Sige, ha, Jean, Sam, mouna lang ko ninyog pauli. May importante pa kong lakwon.”

Igo lang ming mitando si Samuel. Nakahibawo ko nga gihatagan mi ni Almera og lugar nga magkaestorya mi si Samuel nga kami rang duha. Nangidhat si Almera nako dayong lakaw. Nakapanglingo na lang ko. “Komusta, Jean?” “Aw, mao gihapon ko, Sam. Always kong naghandom kang Rey” Nanghupaw si Samuel. Nasabtan ko siya. Naluoy na man gani ko niya apan kutob ra dinhi. Di daling kalimtan si Rey labi na kay kalit kaayo ang iyang pagkamatay.

“Maghuwat ko, Jean. Bisan unsa kadugay, maghuwat ko.”

Puwerteng seryusoha ni Samuel.

“Kining, Sam, nganong di nimo suwayan nga magmahal og laing girl? Lisod ang paghatag nimog paglaom tungod sa gugma ko kang Rey.”

“Mahimo man unta na, Jean, kon di pa lang tinudanay ang love ko nimo. You know gyud nga true love ang gibati ko nimo.”

Naglisod gyud ko sa pagpasabot kang Samuel nga mohunong na siya sa pagpaninguha nako.

Natugkad ko ang kadako sa iyang pagmahal nako.

“Ikaw gud, Sam. Basta nakahibawo ka na nga way kaseguroan ang imong gugma nako.”

“Nakasabot ko, Jean. Di tika pugson bahin ana. Hangyo lang nako, pasagdi ko nga magpadayon sa pagmahal nimo.”

Wa na koy nahimo, mitando na lang ko. Mitan-aw ko sa palibot. Bisag init ang kaudtuhon, nagkadaghan ang nanagkot sa mga minahal sa ilang kinabuhi nga namatay na. Misamot kabaho sa kandela ang sementeryo.

“Unyang hapon pa ko mopauli, Sam. Basig duna ka pay lakwon.”

“Di sab ko magdugay dinhi, Jean. May adtuon pa sab ko.”

Unya nananghid na si Samuel nga mobiya nako. Nakapanghupaw ko pag-ayo samtang gisundan ko siya sa pagtan-aw. Kon pagmahal lang, nakahibawo ko nga gibati gyud kini ni Samuel nako. Unta, matugbangan sab sa maong pagmahal sa babaye nga iyang ikauban sa kinabuhi. Sa akong bahin, di gyud ko makaingon nga siya ang ipuli ko kang Rey. Wa mopitik ang akong kasingkasing sa paghigugma sa laing lalaki.

Gawas kang Rey. Si Rey lang ang gipitik sa akong kasingkasing. (SUMPAYAN)