Pagbuto sa bolang kristal
Usa ka mangilngig nga hitabo wala damhang midangat sa usa ka bag-ong managtiayon. Si Fredmon ug si Lusing nangamatay uban sa lima nila ka bisita sa adlaw mismo sa ilang kasal. Gawas sa lima nga nangamatayng bisita, may lain pang lima nga inimbitar nga nasamdan, nga ang usa niini naputlan gayud sa bukton. Nahitabo ang maong trahedya dihang mibuto ang bola nga kristal sa manalagnang si Uray Tikay nga gituyo gayud nila pagkuha sa bukiran sa Kantaw-an aron pangutan-on sa mahimo nilang kaugmaon human sa ilang kasal.
Nagpatagna ang bag-ong kinasal sa banggiitang manalagna kon magmahimungayon ba ang ilang panagtiayon. Ang panagna gihimo sa balay nilang Lusing human sa makabusdik nga piging o kumbera nga gihimo sa ilang paghiabot gikan sa simbahan.
Sumala sa pamahayag ni Serapia, usa sa mga mingluhod sa kasal nga maoy naputlan og bukton, mibuto ang bolang kristal dihang gisukot kini sa manalagna kon tinuod ba ang gipanaad o gipanumpa ni Fredmon nga kalimtan niya sa dayon ang una niyang asawa nga si Besing nga namatay duha ka tuig na ang nakalabay. Ang maong pagtagna sugo ni Lusing nga mipasalig kang Fredmon nga makigminyo kon dili na kini mohandom sa kanhi niyang asawa.
Mipadayon pagsaysay si Serapia atubangan sa mga tinugyanan sa balaod, “Human ikabungat sa manalagna ang maong pangutana, nahasiga ang among mga mata kay maoy milutaw sa bolang kristal ang panagway ni Besing nga nagpaminti sa kasuko. Siga kaayo ang mga mata niini. Unya misiyaok ang bolang kristal ug mibuto sa labihang kasipa. Human sa buto mao na lamay akong nakita nga nakuyaig ang mga lawas sa bagong magtiayon, ug ingon man ang nahaduol nga mga bisita, mipasad sa hawanan uban sa daghang dugo nga mibanaw. Unya mao na lamay akong namatngunan ang kabanhod ug kahapdos sa akong mga bukton, ug sa akong pagtan-aw putol na kini kutob sa siko.”
Sa maong pamahayag ni Serapia naglibog pag-ayo si SPO3 Rael Banez, hepe sa kapulisan nga nag-imbestigar sa maong hitabo, kay bisag giunsa nilag tuon ang maong kaso mao gayuy milutaw nga walay tawong buhi nga maoy nagpabuto sa bolang kristal. Miturok ang ilang katahap nga ang maong hitabo minugna sa kalag ni Besing. Kini iyang gipasikad sa ilang nahibaw-an nga nanugon kuno si Besing sa dayon niining kamatay nga dili paminyuon si Fredmon... nga ipatuman ang panumpa sa bana nga siya (Besing) lamang ang higugmaon ug mahalon sa tibuok niining kinabuhi.
Ang maong katahap ni SPO3 Rael Banez gidasunan ni Dr. Felixberto Cinco nga usa ka parapsychologist.
“Jealousy is a strong emotion that can often give people who die the power to retaliate violently from beyond the grave when their spouse or lover tries to find happiness with another,” nagkanayon si Dr. Felixberto Cinco sa iyang pamahayag. Unya midugang siya pag-ingon nga daghan nang mga panghitabo nga sama niini, diin ang kalag sa asawa o bana mohimog tilimad-on silbing pahinumdom sa ilang gipanumpaan kalabot sa ilang pagminahalay sa ilang nang pagtaliwan ngadto sa laing kalibutan, sa mga higayon nga ang minahal nga ilang gitalikdan malimot sa ilang mga panumpa ug moluib sa ilang mga saad. (KATAPUSAN)