TRIPLE-DOUBLE NI JAMES WA MAGSILBI
Nasugamak sa ilang ikaduhang kapildihan ang Cleveland Cavaliers bisan pa man sa triple-double nga performance ni LeBron James sa dihang gipakaging sila sa Brooklyn Nets, 112-107, sa bag-ong gisugdan nga 201718 NBA season.
Si Spencer Dinwiddie maoy miugbok og timaan sa kapildihan sa Cavaliers pinaagi sa iyang tres sa katapusang 43 segundos nga nagbaliwala sa 29 puntos, 13 ka assists ug 10 ka rebounds ni James nga maoy iyang ika-56 nga triple-double.
Naklaro ang kapildihan sa Cavaliers sa dihang nasipyat si James sa iyang duha ka
free throws sa katapusang 7.6 segundos diin niadtong higayona naglabaw og dos puntos ang Nets.
Si Dinwiddie mitapos sa duwa nga may 22 puntos alang sa Nets kinsa misaka ngadto sa 3-2 nga baraha nga sama usab sa Cleveland.
Ang Houston Rockets, misandig sa three-point shot ni Eric Gordon aron patapsingan ang Philadelphia Sixers, 105-104.
Ang kapakyas sa Sixers sa pagprotehir sa ilang 11 puntos sa naghinapos nga bahin diin gawas sa mga turnovers ug nakamugna usab sila og mga pinugos nga itsa ug sayop nga mga desisyon. Kabahin niini mao ang goaltending violation nga nahimo ni Joel Embiid, ug ang sayop nga desisyon diin imbis nga ang sinaligan nga sila si Embiid ug Ben Simons maoy moitsa, si Jerryd Bayless maoy nihimo niini.
Si Gordon mitapos sa duwa nga may 29 puntos, James Harden nakadugang og 27 ug 16 puntos ug 20 ka rebounds ang natampo ni Clint Capela.
Nangulo sa pildirong Sixers si J.J. Redick nga may 22 puntos, Embiid 21 ug Robert Covington nga mikutlo og 20.
Gipawong sa San Antonio Spurs ang kainit sa Miami Heat, 117-110, samtang nagpadayon usab ang kahanas ni LaMarcus Aldridge ning maong season. Siya mikutlo og 31 puntos nga gidugangan ni Rudy Gay og 22.
Samtang nalimitahan man tuod si Paul George sa iyang kanhi
team ngadto sa 10 puntos lang, apan ang triple-double ni Russel Westbrook maoy nagtuboy sa Oklahoma City Thunder ngadto sa 114-96 nga kadaugan batok sa Indiana Pacers.
Si George kinsa gi- trade sa Pacers ngadto sa Oklahoma City na fouled out sa katapusang 6:15 nga nahabilin sa duwa ug igo ra usab kining nakaduwa sulod sa 19 minutos.
Gihuman ni Westbrook ang duwa nga may 28 puntos, 16 ka assists ug 10 ka rebounds samtang mipaksit usab og 28 si Carmelo Anthony nga may 10 ka rebounds.
Gilupgi sa Hornets ang Nuggets, 110-93; gitangtangan og tango sa Detroit Pistons ang Timberwolves, 122-101. Midaog usab ang defending
champion Golden State Warriors, 117-112, samtang girehistro sa Los Angeles ang ilang ikaduhang kadaugan sulod sa upat ka duwa pinaagi sa paglumos sa Washington Wizards, 102-99 sa overtime.
Nalabnot na gyud sa Dallas Mavericks ang ilang unang kadaugan, 103-94, batok sa Memphis Grizzlies, ug gipakuratsa sa Phoenix Suns, 9788, ang Utah Jazz.