CARDINAL KINAHANGLAN BA SA CEBU ARCHDIOCESE?
Human malubong si Cebu Archbishop Emeritus Ricardo Cardinal Vidal, kinahanglan ba nga dunay madestino nga cardinal sa artsidyosesis sa Sugbo?
Si Msgr. Joseph Tan, tigpamaba sa artsidyosesis sa Sugbo, namahayag nga dili maapektuhan ang pagpadagan sa artsidyosesis kon way cardinal kay ang mga panginahanglan matubag sa arsobispo.
Sumala niini dili kinahanglan nga naay cardinal sa usa ka artsidyosesis kay ang cardinal alang sa universal church ug dili local church nga nagpasabot ang mga cardinal ang labing suod nga trabahante sa Santo Papa.
Si Tan nipaklaro ang cardinal dili usa ka opisina nga kon dunay bakante, ilisan ug way nahibawo kon kinsa ang tagaan sa maong titulo.
Siya nipasabot nga ang Santo Papa lang ang dunay gahom pagpili kon kinsa ang iyang tagaan sa titulo o itudlo pagka cardinal.
“Dili ta mag- expect nga mahatag sa atua tungod lang kay namatay si Cardinal (Vidal) kay ang Santo Papa man maoy mopili ana kon kinsa ang iyang tagaan,” sumala ni Tan sa pakighinabi sa Superbalita Cebu kagahapon.
Si Tan nagkanayon nga kasa- garan sa mga cardinal nga natudlo panahon ni Pope Francis naa sa mga lugar nga sa una way kasaysayan nga naay cardinal.
Pananglitan, matod niya, sa Kidapawan, way cardinal kaniadto apan gibutangan human natudlo si Cotabato Archbishop Orlando Quevedo niadtong Enero 12, 2014.
Si Tan nidugang ang mga cardinal nagpula kay sila maoy nisaad nga magpakamatay alang sa simbahan.
Sa kasamtangan, tulo ang buhi nga mga cardinal sa Pilipinas, duha ang aktibo sila si Manila Archbishop Luis Antonio Cardinal Tagle ug Quevedo ug ang niretiro nga si Gaudencio Cardinal Rosales.
Si Quevedo ang katapusan nga natudlo panahon ni Pope Francis.
Sumala ni Tan dili kinahanglan nga usa ka arsobispo ang matudlong sunod nga cardinal. Apan, si Tan nanghinaot nga matagaan sa samang titulo si Cebu Archbishop Jose Palma alang sa mas nga gahom ug bug-at nga responsibilidad.